座落北角英皇道60多年的皇都戲院，前身為1952年開幕的璇宮戲院，雖被評為香港一級歷史建築，是現存戰後最古老戲院建築，但也逃不過時代變遷面臨清拆，只能存留在香港人的回憶中。
70歲的鄭偉強（阿鄭），1965年入行做戲院美術廣告，即行內人所稱的「寫畫佬」，作品曾高掛皇都戲院，這天阿鄭應《蘋果》之約重回皇都話當年，畫電影廣告畫畫足20多年的他，80年代尾仍有為德寶院線做戲院廣告，直至1990年退出，見證過香港戲院行業最輝煌年代。
「50幾年前嘅事，我賺到3憶：回憶、思憶、追憶！」阿鄭風趣地說。
阿鄭從小喜歡畫畫，15歲那年看到招聘美術學徒廣告，於是前往拜師學藝。「70蚊一個月，唔包伙食，當時師傅（張金戈）做緊百老匯戲院（現旺角滙豐大廈）、明星戲院（現為荔聯大廈）、仙樂戲院（現為新寶大廈）同華都戲院（現華都中心），我一入行喺呢4間戲院做先，叫做戲院美術廣告，行內叫寫畫佬。咁係分開兩種，本身戲院嗰啲叫美術部，畫紙嘅人像，另外外牆掛嗰啲木板，一般係電影公司畀錢，另外搵人做，係外判嘅；西片就由美國印過嚟，因為香港以前冇咁大印刷機印到呢啲海報，彩色亦好少，多數黑白，所以只有荷李活西片先至印到過嚟逐張駁，香港冇呢個技術，所以我哋要畫咗一塊塊拼上去。攞相片或者海報，打格仔，假設相片每一格係1分或者2分，我哋畫喺板度1呎或者2呎，放大10倍、20倍，先打咗稿，然之後上色。」
究竟「寫畫佬」跟阮大勇這類「海報師」如何分工？
阿鄭道：「海報有兩個做法，一種係電影公司搵設計師設計海報，例如阮大勇同以前邵氏美術部嘅黃金巴，佢哋設計咗海報之後，放大咗掛外牆就係我哋做。掛上去係判畀人做，一種係搽漿糊外牆，黐上去，一種係用竹棚或者鐵架，一塊塊掛上去，嗰啲叫戲院廣告大牌；一般戲院都有鐵架，但如果臨時要加大宣傳，個鐵架唔足以負荷，就另外加竹棚擴大啲，我記得我做李翰祥套《西施》，成個倫敦戲院由頭到轉彎搭晒竹棚，做晒啲戰車馬車，連埋大堂啲柱都做埋decoration。戰車同馬車都係半立體。」
雖然已是半世紀前封塵往事，但阿鄭對每一個工序都依然記得清清楚楚，包括初入行用粉彩畫在帆布釘落木架，然後掛在戲院騎樓底，落畫後將帆布以清水洗完再畫，相當環保。
阿鄭說，一般掛戲院外牆的廣告畫，由多幅4乘6呎畫組成，最少12幅，最多去到60幅，60、70年代每幅價錢由12蚊到50蚊不等，即一張廣告畫最平百多元去到最貴數千元。「嗰時掛幅畫都係2蚊塊，掛上去連拆落嚟都係2蚊，但最少12塊，因為太細睇唔到冇意思，我印象中最大掛畫係新蒲崗麗宮戲院，佢打橫最闊，因為佢係香港最大戲院。」
要多久完成最大60幅戲院廣告畫？
「3日，因為唔係一個人，我哋有畫畫、寫字、油色，大概3至4個人做，我就乜都做過。我哋攞月薪，通常戲院一個禮拜一套戲，啲戲收得就兩個禮拜，咁我哋就唔使返工，如果勁嗰啲3個禮拜，咁就發達《時光倒流70年》做成大半年，真係唔使返工都有糧出，但如果畫期短唔收得，馬上即刻抽調返工，通宵都要做。」
80年代是香港電影黃金歲月，戲院最輝煌年代，也是寫畫佬最忙、最賺錢的年代，整個行業逾百人，除戲院廣告外，每年中秋商廈外牆的大型月餅廣告，更是寫畫佬們最賺錢外快。
「好似我咁，我最高峯做4間戲院美術部主任，做過恆星戲院（現無限極廣場）、香港大舞台（現合和中心）、明星、仙樂啲戲院做到拆，而電影公司判畀出邊做嗰啲，香港大概有4間最大，係專做廣告畫。」那些年，阿鄭又正職又幫外判，做到冇停手，歷年產量數以千計，畫過《鐵金剛橫掃皇家賭船》、《猛龍過江》和《七彩難兄難弟》等等，港九新界甚至離島戲院也有阿鄭的畫作。
哪一類型電影廣告最難畫？阿鄭笑說：「冇最難畫，有最易畫，最易畫西人，因為西人輪廓同筆觸可以豪放啲、快啲，如果中國演員始終面滑溜溜啲，要嘥啲工夫，同埋觀眾個認知度太高，所以我哋鍾意畫鬼佬。」
寫畫佬生涯中，豈少得畫三級片！
「有！大華戲院我畫過《十命奇冤》，日本恐怖片，我喺外牆紮咗個公仔，20呎高，啲頭髮我搵黑冷嚟做，掛咗之後我畀人拉去差館，對面有間酒店對到正一正，而家永安百貨公司個位，嗰間酒店報警，拉咗我去油麻地差館，話太恐怖，要拆落嚟，經過嗰次之後，香港影視處嗰啲廣告都要censor。」
問到歷年最滿意作品，阿鄭搖頭說：「其實冇，因為每個禮拜每日咁做，我做咗幾十年，無數嘅片做過，你根本冇呢個印象，只係錢多錢少，所以我最記得係李翰祥套《西施》最多錢，係邵氏幾倍。仲有倫敦戲院上映嘅《聊齋誌異續集》最有印象，因為我有份掛上去。」
跟皇都一街之隔的國都廣場，前身是國都戲院，1965年開業，直至1995年結業。曾幾何時，戲院幾乎多過便利店——「總有一間喺左近」。
阿鄭解釋箇中原因：「電視未普及之前，香港人嘅娛樂靠睇戲，1967年無綫開台之後，到1972年轉彩色先至蓬勃，以前唔係個個屋企有電視機，同埋以前冷氣唔普及嘅時候，睇戲係享受冷氣，雙重享受。因為有戲院緣故，導致人流多咗，養活好多小販同商店。」
阿鄭還告訴記者，當年戲院有許多不成文規矩，例如戲院外擺賣的流動小販攤檔，要暗地課金給戲院當交租，電影公司要在戲院掛廣告，也得「識做」；另外，戲院又會在其中一日播舊片，將當天收入作為員工下欄，阿鄭說：「我記得最多係《江山美人》，邵氏揀一日畀你播，唔分賬，收入除咗支出之外就分畀夥計，叫做『夥計畫』；另外夥計收入就係炒戲票啦，有啲夥計攞啲票出去賣，炒黃牛。」可見當年戲院業相當「好世界」。
「80年代做到冇到停手，係我哋最好搵嘅時候，我喺TVB、喺亞視做，仲有秘撈，做緊德寶院線，佢哋每一期有5、6間戲院畀我做，90年我仲做緊。不過，我85、86年左右只係做設計，設計完就交畀人做。而家呢行冇得做㗎啦，因為而家係迷你戲院，冇廣告位，就算有廣告位，而家電腦放出嚟就得，唔使畫。」
望住眼前皇都，阿鄭清楚記得廣告畫曾高高掛在外牆。「我唔記得係藝霞定梅花歌舞團喺度做，嗰時我喺度掛過畫。」皇都戲院大廈被新世界發展收購，整座戲院面臨清拆，阿鄭覺得十分可惜：「呢個係香港歷史建築，應該保留嘅，不過佢個位置咁靚，發展商要發展，都冇辦法。」
後記：
鄭偉強不只是「寫畫佬」，更是超級「秘撈王」，早在60年代開始已歌影視四圍插旗，包括為粵語長片《黃飛鴻》系列寫字幕，阿鄭說：「《黃飛鴻》嗰體字叫『石門頌』，一種字體，冇乜人寫，我入TVB第一份工都係寫字幕，嗰時我寫《民間傳奇》、《朱門怨》。」
年輕時特別好學，阿鄭學滿師後即到香港工業專門學院（理工大學前身）修讀廣告設計，導師陳兆堂正是無綫前總經理陳慶祥胞兄，70年代阿鄭便是獲陳兆堂推薦加盟無綫，由寫字幕做到美術部主管。阿鄭在無綫打工期間，仍繼續「寫畫佬」工作，甚至為許冠傑、鄧麗君、張國榮、梅艷芳等無數天王巨星個唱擔任舞台設計，1993年阿鄭更獲日本邀請出席國際舞台美術展，向日本人展示香港舞台魅力。
阿鄭過去數十年游走亞視、大陸、台灣做製作人，擔任過《康熙來了》總監，2010年尾重返無綫，至去年退休前任職無綫集團行政總裁助理，亦即李寶安左右手。還有鄧麗君、邵逸夫及太太方逸華的追思會，都是阿鄭設計佈置，就因為當年工作狂沒時間陪伴家人，年屆70歲的阿鄭，如今正好向家人彌補，趁退休後好好享受人生和家庭樂。
採訪：戴彩煥
攝影：葉君海
攝錄：葉君海、馮嘉銘
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
