每個年代，「香港電影」四個字都代表着不一樣的慨念。有人說香港電影已死，亦有人說香港電影近年不乏優良作品，仍有希望。曾執導《意外》、《殺破狼2》、及甄子丹主演的《西遊記》系列資深導演鄭保瑞最近接受澳門廣播電視訪問，說出自己在電影業30年來的感受及看法。
見識過電影業的輝煌、體會過行業的寒冬，鄭保瑞也曾試過在電影上感到迷茫，當年他憑《熱血青年》獲金像新晉導演獎後有感自己的不足，輾轉下到杜琪峯旗下籌備《意外》，卻在創作遇上關口，當時杜琪峯是該戲監製，鄭保瑞說：「佢搵過我出去食飯問我搞成點，我好開宗明義咁講『我諗緊你諗乜，諗緊你覺得邊樣嘢啱』，佢就話『搵你返嚟係拍你嘅嘢，唔係拍我嘅嘢。點解一路Ban橋？唔係話我鍾唔鍾意，而係未做到你自己口中所講嗰樣嘢，鍾唔鍾意有乜所謂，我自己啲戲我自己都唔鍾意』」如是者，杜琪峯為鄭保瑞擋住了各種商業壓力，只要對電影有好處，一切任由鄭保瑞發揮。
說到港產片，鄭保瑞表示：「香港電影曾經出過好多好戲，但係已經掩蓋唔到其他我哋犯嘅錯。一切都係因果，真係有做得唔好而令到人哋覺得『係你哋背棄咗觀眾』，當你想做好嘅時候，其實未必咁易。你哋覺得票房收過千萬好似幾好，其實蝕到死。哪怕係低成本嘅戲，我諗都係得《淪落人》係賺錢，因為撳到個成本得200萬拍，而佢真係拍得好好，我相信陳小娟第2部戲，班工作人員都未必會肯收同樣價錢拍，但係你唔可能每次都咁樣求人幫忙，咁唔係一個工業，而係一個興趣班，大家要咁樣搲咁樣揼心口，即係你話畀我聽個工業玩完。」
鄭保瑞說：「而家你拎住3,000萬都根本唔夠，拍部文戲都仲得。成本點都唔會平得到，你靠香港票房根本回唔到本，假設你用3,000萬成本拍咗套戲，你要喺香港收幾多先賺得返？1億。你收1億票房先收得返3,000萬本返嚟，香港有幾多套有1億？有嘅，《復仇者聯盟》囉，人哋拎咗幾十億美金拍先收到你香港1億嘅錢，有時唔係唔試，而係試嘅成本好貴，係咪真係要大家賣樓賣車咁去做？咁樣唔係一個健康嘅工業，一樣都係興趣班。」
鄭保瑞將大陸的影業市場與香港比較，道：「當年大陸咪就係興趣班，但係而家佢個市場真係變咗工業，因為人哋大家係可以討論拍咩類型、討論搵咩人再去搏，『你要4億拍？唔緊要，我搏到15億返嚟！』都係賭博嚟㗎！有機會乜都冇晒㗎，但係都有得搏吖嘛，好過香港冇得搏，你逼到老細一次，你好唔好意思逼第二次？你逼到個老細拎5,000萬出嚟拍商業片，香港拎返3,000萬咁又點？咪拎得返1,000萬返嚟，仲有嗰4,000萬邊個畀返佢？4,000萬喎！我不如拎去買豪宅，做乜要畀你拍電影？」
直白地道出香港電影圈情況後，鄭保瑞嚴肅地強調：「而家喺香港開戲嘅老闆，係真係熱愛電影或者根本係佢本業嚟佢哋先做落去，如果你喺投資角度去諗，根本5年之前就已經唔玩。你唔會見到李家誠嚟投資電影，因為件事冇得做。」
那麼近年公司積極開拍港產片，自己密密拍電影的古天樂呢？鄭保瑞說：「《逆流大叔》都蝕㗎，佢（古天樂）冇得唔做大陸戲，唔係邊有錢畀你哋拍香港戲？大家反而怪佢拍大陸戲，但又唔去睇呢啲（港產片），咁邊個畀錢你呢？生出嚟咩！你真係要人哋部部戲啲片酬拎嚟拍香港電影呀？咁其實又係興趣班，冇生意做。」
鄭保瑞強調不是責怪觀眾，而是道出事實的無奈：「觀眾係冇需要理解電影行業，觀眾咪純粹睇戲，但係我哋自己圈內人好少會出嚟講呢啲嘢，好少人講個真相出嚟。個真相觀眾可能都係未必會理解。」
那麼，拍攝過《西遊記》系列商業大片的鄭保瑞是否離棄香港？他說：「我係想返嚟香港拍，但點解令到老闆覺得有生意做之餘，我哋都希望有新題材去吸引觀眾，我覺得唔係冇機會，但係我哋要認命就係我哋市場真係細，我哋得700萬人，當年得係因為我哋有輸出，當日養起香港電影圈嘅唔係香港觀眾，而係外埠全亞洲都睇緊香港電影，呢啲先係一個真正嘅工業，塘水滾塘魚係好難養得大，當年係全世界唐人街都做緊香港電影，今日，邊個睇？」
最後，鄭保瑞說：「香港電影冇進步係真嘅，我哋要承認呢件事，係我哋做錯嘢而離棄咗香港觀眾，呢個係我哋（電影業）要承認嘅事，但係而家要修補的話，喺呢個情況下係難上加難，我成日都話你做錯事係要贖罪，就係由一個地獄跳去另一個地獄，贖罪嘅過程係比死更難受，香港電影而家就係比死更難受。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
