2020年6月9日星期二

晒27年前劇照網民回味李司棋經典演出 #李司棋

晒27年前劇照網民回味李司棋經典演出

司棋姐跟陳玉蓮、萬梓良、陳法蓉當年喺美國拍重頭劇《巨人》外景。

69歲依然潮爆嘅李司棋，經常化身「IG達人」update新相，分享生活點滴。今日凌晨司棋姐分享珍藏照之餘，仲同粉絲們大玩遊戲，勾起大家唔少集體回憶。她貼出一張跟陳玉蓮、萬梓良、陳法蓉合照留言問：「友人傳來的舊照，知道是甚麼劇嗎？劇中我拿電鋸追人㗎！」司棋從影超過50年有咁多粉絲，呢條問題毫無難度，好快被鐵粉破解，唔少舉手搶答：「巨人，司棋姐妳飾演張衛健媽媽。」、「巨人李秀慧，當年為麥約翰醫生誕下一子！」網民對她的演出相當回味。

《巨人》劇情係描述香港兩大家族洪家和樂家之間嘅恩怨情仇，雖然李司棋喺《巨人》中只是客串演出，於第27集在美國煤氣爆炸身亡，但角色患有精神病，劇情講她绑架欲殺害「萬子」及拿電鋸追人等場面，好有戲做，而且當年演員卡士萬梓良、陳玉蓮、林俊賢、陳法蓉、張衛健、梅小惠、許紹雄等，個個好有份量。

司棋姐繼三年前演過《溏心風暴3》後就半退休狀態，未有新作品，觀眾等到頸都長埋，好想再睇到她精湛演技。