2020年6月26日星期五

【新進KOL】孤獨的橫店美食家劉浩龍挑戰靜英英雲吞店 #劉浩龍

【新進KOL】孤獨的橫店美食家劉浩龍挑戰靜英英雲吞店

劉浩龍變身飲食界KOL，一支公去試雲吞。

就咁嘅，劉浩龍(師兄)去咗橫店拍戲，仲要係古裝片，人生第一次拍古裝，佢好興奮因為好有新鮮感。開咗十幾日工終於放假，師兄就一支公拎住支自拍神棍開始加入KOL大軍，咁佢係邊方面嘅KOL呢?係飲食界嘅。

放假嘅師兄就去搵嘢食，「酒店行出嚟呢條街，八分鐘，呢條街好多嘢食，一直見到有間雲吞舖好想入去試。」點解師兄咁想試?「因為好乾淨，同埋永遠都冇人，阿媽教落，冇人就唔好入去，但我偏向虎山行。」然後師兄真係入咗名叫財記嘅舖頭，佢話睇吓佢咩料先，首先佢影吓個廚房，真係好乾淨，再影店面，真係冇人，最後影吓餐牌，價錢由1.5蚊至25蚊，最貴係25蚊嘅蝦仁大雲吞，最平個半嘅五香雞蛋。

師兄先叫咗碗大嘅韭菜雲吞，食評係，「好食喎，個皮好薄，呢度叫親啲餃子，個皮都好厚。」之後再叫多一碗小雲吞，「小雲吞仲好食，間舖冇做外賣，老闆好有性格，一直目測揀食店食嘢，又成功咗一次，抵我行到身水身汗落嚟，好食。」讚完仲舉起手指公。

鏡頭一轉，師兄就調咗位坐咗喺廚房隔離，自拍自己仲見到老闆，佢話好鍾意食完嘢同老闆傾吓偈，從而知道點解舖頭咁新咁乾淨，「原來間舖同我嚟呢度嘅日子差唔多，開咗11日咋，老闆之前間舖喺附近開咗八年，都算係老店，好食，食到好飽只係24蚊。」講完再喺老闆面前舉多次手指公，老闆好嘢，師兄講咁耐拍咁耐，佢半秒都無望過鏡頭。