八九六四後，移居英國的港女Margaret無故遭人用咖啡壺擊斃，冤魂不息，依附在咖啡壺之中。咖啡壺後來被一位香港年輕人阿Bean在網上bid返香港，放在跟朋友一起創業的咖啡店內，展開了一連串人鬼故事。
以上情節，是陳志雲投資及主演新處境網劇《姨媽到》的故事背景。
陳志雲近日又再搞新意思，與石詠莉、莫竣名（Louis）和劉亭君（Ivy）合作演出處境劇《姨媽到》，志雲大師反串飾演女鬼Margaret Elizabeth Dunn。之但係，在上月底生效的《港區國安法》下，連「良知」貼紙都被指可能違法，志雲處境劇涉及「八九六四」、「慘死」、「冤魂」等內容，又會否變得敏感甚至踩界？《蘋果》請來志雲與Louis和Ivy一起拆解。
英式貴婦打扮的志雲，化身女鬼Margaret笑說：「我係鬼嚟㗎，點會踩界啫！一啲界都冇踩。喺社會大環境之下，你會知道我哋好貼地，但說話同劇情發展，叫人去示威、分裂國家、叛逆⋯⋯呢啲意識係冇嘅，我哋唔推廣嘅。係佢哋舖頭（咖啡店）展示咗啲相，係香港發生過嘅嘢，記者影嗰啲相。」Louis就指新劇主要講疫情，又強調：「我哋連口號都冇嘅。」
志雲解釋，他所演女鬼是巧合地於1989年6月4日之後死去：「我89年移民英國，嗰年發生乜事，睇報紙就知，我驚㗎嘛，咪移民囉！點知我連凳都未坐暖，就俾人用咖啡壺鑿死我，我又唔知邊個殺我，我咪唔肯走，寄宿咗喺咖啡壺裏邊。」咖啡壺輾轉落入一間名為Imado的咖啡店，諧音「姨媽到」，由於自己是大姨媽身份，所以一叫「姨媽到」，Margaret就會現身。
港台《頭條新聞》受打壓而於上月停播，今次推出《姨媽到》是否有意接棒？Ivy否認說：「陳生話做呢個劇係早過佢哋唔做，個疫情一開始我哋就計劃，諗啲嘢等香港人開心啲。」志雲亦笑說：「受疫情影響，啲話劇演員邊有得開工啫？如果冇得開工，我咪可以剝削佢哋，叫佢收平啲做。志雲投資㗎，佢儍㗎，明明冇回報，不過你老闆（黎智英）嗰種儍仲危險，隨時俾人拉，我呢種最多蝕晒啫。」
早年志雲演粵劇曾扮過花旦，時裝女性今次是首趟，為研究演好女性角色，志雲特別研究英女皇、戴卓爾夫人、陳方安生、葉劉淑儀和董建華太太打扮和言行舉止，志雲：「我研究咗好多，唔似女人嗰啲，我係唔睇嘅，譬如林鄭月娥，我覺得冇女人嗰種感覺，如果我扮返男人會研究吓佢啲動靜。」
一部處境劇少不免包含社會民生和愛情等元素，但近日就傳出大陸廣電總局再新增20條禁令，包括愛情戲不能太甜蜜、穿越題材要有「合理科學解釋」、同性戀題材要轉為友情等，Louis也有留意，揚言「拭目以待」，Ivy亦佩服大陸編劇的才能：「演員都係攞住劇本嚟做，編劇可以寫啲乜嘢題材呢？我哋用林日曦所講嘅『悲觀性樂觀性宏觀』，要寫啲好好嘅嘢，佢哋會好勁好勁，以後佢哋嘅編劇會好犀利好犀利。」
身為無綫前總經理的志雲，就大讚這20條禁令好到不得了：「我覺得廣電局用心良苦，啲穿越劇、神怪劇要科學根據，冇根據你都要作到有根據，而仲要係可信性，咁嘅例都諗得出嚟，你話係咪好有創意？仲有愛情不能太甜蜜，呢個咁主觀性要客觀性判斷，你個人就要有好大嘅宏觀。」
早於禁令發佈前，志雲原來一早體會過大陸劇集審查：「其實唔係我第一次接觸呢啲話題，以前TVB工作時同內地合作過，好似《歲月風雲》，拍完個劇畀佢哋審閱，呢個係城市劇，內地當局就話個劇嘅opening太城市化。城市劇太城市化，我哋都揣摸咗好耐，結果又可以揣摸到令到佢冇咁城市化，同理兄弟之間唔可以相殘，惡人一定要受到懲罰，呢啲例子真係好好，因為而家喺現實世界啲衰人好似越嚟好咁嘅？（越講越激動）咁得唔到感情宣洩吖嘛，如果喺戲劇世界都係啲衰人得晒逞，咁我哋咪好嬲？但現實世界真係咁喎，咁你話呢啲條例係咪好好？」
這還不止，志雲亦講到在大陸連小小的十字架也容不了：「以前明珠台有個《Eye on Hong Kong》，喺內地都睇到，有一集話內地唔播得，個理由係presenter陀咗個十字架，咁唔怪得之後來要拆十字架啦，陀住個咁細個都睇到！」
近日有傳無綫對藝人新合約加辣，新增了一項條款，若藝人因個人行為及言論，包括政治立場等令無綫蒙受不必要損失，涉事藝人將要承擔一切責任及賠償。志雲聞言忍不住鬧爆：「咁嘅條件係唔公道，點可以咁啫？人哋自己有自己思想，我嚟賣藝啫，我唔係賣身，我唔係將個靈魂賣咗畀你，不過如果你話我哋公司喺內地發展好緊要，如果你講啲嘢令到公司尷尬，我哋內部就唔能夠再用你㗎啦，咁我會明白，但唔使寫埋個條約喺合約度。點賠畀你啫？TVB大台嚟㗎嘛，最多話炒佢啫，我覺得已經係最嚴重嘅懲罰。」
每集《姨媽到》會邀請不同嘉賓演出，包括曾俊華、黃夏蕙、陶傑和王喜等等，暫定7集，於7月27日王喜53歲生日及志雲母親死忌當天，於志雲YouTube頻道播出。
採訪：戴彩煥
攝影：仇志德
攝錄：廖達燊、林賓尼
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
