- 【4月自稱中武肺】吳剛拖欠Eason個唱門票三萬多元退款 受害人孫生:以為佢係名人唔會呃錢
- 8小時前
破產繼續要風光
64歲的吳剛，留給觀眾的經典印象，莫過於永在籌款騷赤膊表演食炭飲滾油的招式。不過到90年代尾，形象騎呢的吳剛淡出娛圈，轉型做飲食生意，及當上「藍店」富臨宴會部總監，身兼埋婚宴司儀。而屢傳財困的他，12年跟因合約糾紛，被頒佈破產令，原在16年回復「自由身」，但被發現其破產令被延至去年7月。
儘管破產，但吳剛堅持人靠衣裝，表面風光！去年本刊兩度發現他偕老婆及兒子一家三口出動，均以浮誇又華麗衣著行街，住的也要揀豪宅君臨天下。但偏偏三萬多元的陳奕迅演唱會門票錢，就拖欠半年不退還，最後要追款人孫先生，報警求助。
代訂餅卡演唱會飛
讀者孫生稱，去年在朋友介紹下，認識可幫他以七折訂購餅卡的吳剛，在交收時，吳剛主動問他，有冇興趣找他訂購12月舉行的《陳奕迅Fear and Dreams香港演唱會19/20》門票。於是孫生結集十二位朋友，共34張門票，每張980元，合共33,320元。不過由代訂餅卡到演唱會門票，吳剛如老手般，要求現金交易，不肯銀行過數。孫生說:「佢話要現金交易，咁大舊錢要現金俾，起初都覺得奇怪，不過聽聞佢已經破產，覺得可能同銀行戶口有啲關係，所以無再仔細問佢。之前搵佢買餅卡，佢都遲咗一段時間先至畀到餅咭我，不過最後都有俾足。陳奕迅演唱會前，佢都有撩我訂張敬軒演唱會飛，不過我只對陳奕迅演唱會有興趣。」
- 去年中孫生在朋友介紹下，認識吳剛買七折餅卡，有過餅卡交易得到信任，之後吳剛主動撩孫生，稱可代訂陳奕迅個唱門票，孫生沒料這次成為他的惡夢。
- 堅持不過戶，只收現金的吳剛，收下為孫生訂購共34張陳奕迅個唱門票，涉及金額共三萬多元，當面收錢後吳剛發收據為證。現在孫生回想，吳剛只收現金，事有蹺蹊。而當日吳剛任職酒樓的卡片，出示的手機號碼已停用，之後他以另一號碼跟孫生聯絡。
自稱利息補償拖欠
去年底因疫情影響，陳奕迅演唱會主辦單位宣布取消，並安排退款，會於今年四月前完成處理，吳剛亦向孫生轉述官方退款公告，指四月先可以退錢。不過孫生見其他朋友已陸續於年初收到官方退款，他則由1月追到5月，吳剛仍不退還款項。「期間都有追佢，不過每個月佢都不斷拖延。」
今年4月，自知不能再用官方做檔箭牌，吳剛便搬出其他藉口，將退款期一改再改，繼續拖字訣。
其中4月自稱中武肺，他給孫生whatsapp留言:「你好！孫兄，這兩天肚瀉氣，全身乏力，檢測呈陽性。下周三才可離開回港入數給你，萬分抱歉敬請原諒，見面再補上$5000給你致歉。」
- 四月仍未退還三萬多元門票錢給孫生的吳剛，自爆中招患武肺，以病為由繼續拖數，又說會加$5000利息作補償。但孫生話收唔到錢，你話畀一百萬都無用。
- 他自稱中武肺，入住深圳醫院。不過之後吳太跟孫生稱，丈夫入院做淋巴手術。
- 吳剛的拖字訣。
- 因疫情影響，陳奕迅個唱去年底宣布取消，官方亦在四月前完成門票退款。
扮誠懇
五月，唔還錢的吳剛繼續一副「誠懇」態度拖數，留言:「孫兄，萬分抱歉……小弟因為在大陸耽誤你的時間，萬分抱歉內疚。這幾天因為身體欠佳要接受治療，下周三才能回港入數給你……」，之後被再三追數，吳剛就send一張在病床相給他。循環再用的「下周回水」，孫生開始感到門票錢凍過水。「已經拖咗好多次，所以已經唔係好相信佢。問佢身處地方，希望去搵佢，但佢都拒絕。我曾經回覆過佢，依家一蚊都唔還，就算話俾一百萬我都無意思，我都唔係想要你嘅利息，只希望佢可以俾番退款我。」孫生說。
- 每次吳剛都以一副「誠懇」態度話會還錢，但最後都係無影，拖數好有技倆！
吳剛老婆代出面
吳剛潛水後，派另一檔箭牌，一位自稱是律師的人與孫生聯絡。「佢喺五月時搵咗一位律師朋友聯絡我，然後同佢律師傾咗一段時間，但都無咩作用，因為都唔係代表佢還錢，純粹只係一位相識嘅朋友。後來我繼續搵佢，但佢開始唔聽電話。有一日有位女子打電話俾我，自稱係佢太太，叫我唔好再騷擾吳剛師傅，有咩問題就搵佢追討。」不過自稱吳太的女人跟吳剛一樣，不斷放飛機。她一時指自己身在外地未能返港處理，一時留言稱:「我在吉隆坡，明天開車回新加坡，昨天我秘書已經滙了，銀行告訴他二個工作日。」不過最後當然如孫生講:「我查過戶口並無紀錄，再搵番佢嘅時候，佢就話秘書搞錯咗，所以要再過數。之後再搵佢，有時又話出咗海，有時又話喺西貢，無耐又話返咗馬來西亞，一時又話喺內地。」
- 吳剛交畀老婆應付後，吳妻同樣施以拖字訣，唔係放飛機，就係自稱已滙錢過數給孫生，當然人家之後check數，又係得個吉。
- 孫生查過戶口，發現又被吳妻老點！
- 除經典表演食炭、飲滾油，他還試過面劈磚頭。
兩公婆各有版本
吳剛自稱患武肺，留醫深圳醫院，但他太太對追款人孫生，卻說另一版本，孫生:「佢太太有講過吳剛師傅要做手術，好似係淋巴手術，同吳剛所講嘅有啲出入。」
老婆拖數兼發爛
拖數唔還，吳剛老婆還要發爛，惡人先告狀！六月時她給孫生文字回覆:「其實為這件事，我批評我先生下次不要多管閑(閒)事，幫了別人人家不會感恩，反而結怨……和你打交道，感覺你是有修養的人，所以才會答應你，以後不管誰開，只能4張。」
受害人報警求助
到六月，孫生為向購票的朋友交代，索性將吳剛太太加入whatsapp群組，方便其他朋友向她追數，但吳她無歉意不特止，還鬧人垃圾，孫生說:「佢仲有話自己無欠我哋錢，仲話出律師信畀我，叫我唔好再搵佢。」未幾她索性電話封鎖孫生。吳剛夫婦拖數失蹤兼失聯，冇計可施下，孫生在七月到紅磡警署報警，並以民事起訴追討。- 吳剛潛水，代夫出頭的吳太亦在七月時手機封鎖孫生，令孫生無法追討下，唯有報警求助。
- 吳妻自知一拖再拖理虧，叫追款人孫生不要生氣。但之後反轉豬肚發爛。
- 追數半年，受害人孫生忍無可忍。
- 「放飛機」留言多的是。
以為藝人有信譽保證
孫生起初以為藝人出面有信譽，點知都上當。「首先佢都算係名人，見佢說話亦好禮貌，諗住應該唔會呃錢。當時諗就算買唔到飛，都應該會退錢。決定將呢件事公開，係唔希望之後再有人中招。」直頭八月初，孫生又多次致電吳剛，他終在whatsapp「蒲頭」，又再一次向孫生開出「空頭支票」，稱會在本月9日返港過數，但最後當然依舊無晒影。
本刊嘗試聯絡吳剛，他沒有接聽，其實近年吳剛不停轉電話，常身在內地。去年他的破產令被延長至今年7月，被延長的原由可包括破產人不合作、行為操守並不令人滿意，或未能擬備收入及取得財產的周年報告等。似乎愛食炭的吳剛，更愛食言，誠信亦跟他財務一樣，破產！
- 潛水兩個月，吳剛在孫生奪命追魂call下，八月初才再「蒲頭」以whatsapp回覆，他再次聲稱於 (8月9日)過數給孫生，但最後當然又係放第N次飛機。
- 做酒樓宴會部總監時，圈中人監製梅小青夫婦，及梅小惠前來撐場。
ChannelNEXT人民學堂：識法大講堂
曾志豪X劉偉聰 同你拆解「港版国安法」
立即收看
----------------------------
全新「和你撐計劃」 專享獨家禮遇 實際行動支持按此了解更多
壹呼百應 號召有心人 請香港人睇壹週刊按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|
