香港電台（港台）近年被指「唔聽話」，《頭條新聞》無得留低、「七一典禮」改由TVB承辦，就連啟播47年的《警訊》亦被切換製作單位，將在另一個電視台「返生」播出。
但真相，似乎只有「行內人」最清楚，前女警員兼《警訊》主持梁皓妤（Ruby）和做了11年《警訊》演員的馬溱禧（Heily)日前接受訪問，Heily坦言近年的港台氣氛確實起了變化，她感慨謂：「差都唔係最近嘅事，好明顯睇得出，喺辦工室內大家都唔敢出聲，好安靜，大家唔會講太多說話，但唔代表冇表達（不滿），整個辦公室都貼滿工會嘅紙，氣氛好奇怪，但大家都有同一個理念。」Heily在《警訊》中經常扮演靚女騙徒，被譽為「警訊之花」，曾以此為榮，如今卻因為警民關係變差，現在社交網自我簡介一欄已靜悄悄地「消失」。她解釋：「之前覺得係好事（封號），但依家有啲保留，因為外面有啲公司或客戶都會問我可唔可以刪走，雖然冇講明原因，但佢哋都唔想人諗太多。」
Ruby就爆料港台與警察公共關係科（PPRB）早在3年前已埋下伏線，抗爭運動與警民關係變差，只是一個契機，令雙方中斷近半世紀的合作關係。Ruby說：「3年前我剛入《警訊》已經有聽過，而佢哋（PPRB）所講嘅原因，係話港台嘅導演同監製對我哋警務人員嘅態度唔好，但對我嚟講係合作得好開心，即使現在冇做，同台前幕後都係咁close。可惜我係一個小職員，唔能夠對老闆（上司）發表任何言論。」
誰是「金手指」Ruby沒有明言，但她可算是警界中的異數，在香港樹仁大學新聞與傳播學系畢業，曾短暫在亞洲電視任記者，2014年滿腔熱誠加入警隊，但入職兩年多已經想擗炮唔撈。她欲言又止：「最大分歧係文化上嘅落差，同我預想嘅警察唔同。而且我未能融入警隊文化，一直覺得警察係應該好正義⋯⋯呢方面可能唔好講喇，因為我老公係警察，佢都被人『搞』，但其實還好，佢唔係黑警，我知道就得。」
Ruby任《警訊》主持期間，人氣明顯沒有另一位拍檔羅啟宏督察般高，她卻有點憤憤不平說：「前期資料搜集全都係我做，其他人有冇做過呢？港台導演監製當然有，但PPRB呢，唔係得我一個主持人，我都要為自己平反，如果我唔講一啲冒警罪，唔畀錢走咗都有罪，以及點解要出示委任證，呢啲主題都係我諗出嚟，唔講大家又點會知道呢？」
Ruby不介意講出「事實」，但早前疑被「藍絲」篤灰，指她曾於FB讚好「香港黑警 Hong Kong PoPo」專頁、曾上載支持平反六四的相片，稱她是「警訊曱甴女警」，最終被調離《警訊》，而她亦在今年4月辭職。「其實我冇講過啲乜嘢，有啲人會覺得你抵死啦，冇咗份工等等，由佢哋啦，但其實唔係，我真係一早就已經想辭職。」
《警訊》將於8月12日播出最後一集，將來會以甚麼形式上場，仍是未知之數。但Ruby和Heily亦不太擔心自己的前路，Ruby現正做freelance PR及海洋保育工作，並應徵做港台另一個節目主持；而向來知道娛樂圈「搵唔到食」的Heily，則更早未雨綢繆，開食品工廠和蛋糕店，做小生意謀生。
採訪：嵐山
攝影：陳俊強
攝錄：沈健程、馮嘉銘
場地提供：BYJ Art Bakery
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
