癌妻再入院
前娛樂台主播林子博，去年4月太太Shirley患上罕見平滑肌肉瘤癌，9月又面對大台請食無情雞，雙重打擊。經過一年多治療，一度好轉的太太，早前又因腫瘤痛再度進出醫院。昨日亦不例外，出院個多星期的Shirle原是返醫院覆診，最後要留醫。阿著太太的林子博說:「依家喺留院，剛才見完醫生，話佢肝酵素高，懷疑個膽塞了，因為肝酵素高，懷疑瘤增大，有機會壓著、塞住個膽，然後影響身體其他部分。」
為癌妻而戰，這一年林子博在患難中，深深體會這行雪中送炭的情義。除了古天樂，還有很多圈中人伸出援手。
汪阿姐報紙包錢相贈
據知其中汪阿姐藉中秋，唔止送上月餅，內裡仲有報紙包住一叠如拳頭咁厚嘅「心意」，打開是一叠千元鈔票，給當日失業兼照顧癌妻嘅林子博解決燃眉之急，應付老婆醫藥費。「其實當時都好驚訝！」林子博說。
一年前今日，林子博在最困難時間，汪阿姐出手相救，事隔一年，林子博仍感激汪阿姐這份窩心。「最初以為只係上嚟攞月餅，因為佢只係叫我攞月餅，一個走馬燈盒包裝嘅月餅，另外再俾咗啲心意我。佢作為一個前輩，特登搵我上去，希望可以幫我少少忙，幫我度過呢一關。無諗過作為後輩，會得到一位前輩幫助。」
古天樂找醫藥費
除了阿姐，還有古天樂的仗義。「古仔介紹咗自己嘅私人醫人俾我，都係見多一位醫生聽取意見，睇吓對方有咩建議。佢都話唔使擔心診金問題，叫我上去睇完就可以走。」子博與古仔識於微時，是90年代拍卡拉OK MV認識，雖然聯絡不多，但古仔對子博這一年的關心從無間斷。「佢會幫我留意有冇工作機會，因為佢問我太太情況時，都會問我最近忙緊咩，睇吓我有冇工作。」他說。
大台給子博無情雞，但另一個電視台，他找到人情味。
「其實我好感恩香港開電視，真係幫我好多，一直有搵我工作，由今年五月開始，一直都有工作。」子博亦都特別多謝前大台公關高層曾醒明，仲有好多幕後，經常幫子博搵工作機會。
半年無工開情緒低落
雖然不少朋友幫手，但受疫情影響，子博有半年冇工開。救妻養家，屬經濟支柱的他，因半年零收入困擾，又要在家人面前隱藏擔憂，令情緒出現問題，「四月嘅時候，突然有幾日情緒好低落，有懷疑自己情緒出現少少問題，嗰段時間瞓醒起身，會突然覺得自己好無用，好懷疑自己價值，係咪已經俾呢個圈子淘汰呢？再無存在價值呢？然後開始鑽牛角尖，唔開心，唔出聲，又唔同仔女傾偈，然後有一日太太同我講，叫我咩嘢工作都去做，唔好左揀右揀，就令我更加情緒低落。我懷疑當時自己有短暫情緒問題。」太太Shirley怕子搏繼續失業，影響家庭經濟，於是叫子博不如轉行送外賣。「本身我有電單車牌，佢講過好多呢啲說話。但好多幕前工作計劃喺五月開始，所以嚴格上有呢啲安排，好難兼做其他工作。」
點都要撐落去
過去一年，照顧老婆同時兼顧工作，林子博不覺難捱，反而最難受，是每當見到她出現癌痛，作為身邊人，無力感好重。「因為主流西醫方面無咩嘢可以做，最近兩日都開始嘗試唔食止痛藥，含有嗎啡成份嘅止痛藥。但佢發覺每一次食完之後都會頭暈，令佢作嘔，然後無胃口進食，引致缺乏營養。連醫生同藥物都幫唔到佢，我會覺得究竟仲可以做咩呢？當佢痛嘅時候，我不能分散佢嘅注意力，所以佢每一次痛嘅時候，都係我最束手無策嘅時候，呢方面覺得自己好無助，無力感好重，究竟應該點樣做呢？」
子博是家中唯一經濟支柱，故他經常提醒自己，無論困難多大，都唔可以冧！
----------------------------
守住新聞自由 和你撐計劃每月$300起撐《壹》仔
按此了解更多
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|
