喬寶寶早前決定暫別香港娛樂圈，舉家移民到蘇格蘭，最近回港拍攝電影《時代》，戲中起用一眾「藍」演員，分別有早前涉嫌醉駕的楊明、楊明女友莊思明、「自己友」曹永廉及撐警藝人李霖恩等。電影備受網民熱烈關注，喬寶寶亦遭網民狠鬧，當時他曾於訪問中坦言有點無奈，亦直言自己冇政治立場。
陳志雲（Stephen）昨晚在其YouTube節目《STEPHEN．傾》邀得喬寶寶擔任嘉賓，他大談入行前後的經歷，亦分享他移民蘇格蘭的生活。向來直話直說的Stephen，於節目開首再度問到喬寶寶接拍《時代》令很多人有意見，到底他接拍時可知道電影有政治色彩？喬寶寶說：「我接嘅時候，知道係警匪片。識我嘅人，都知我對政治非常冷感，政治題材嗰啲，你睇我社交平台就知，我都唔提及佢（政治）。我本人覺得就係政治撕裂緊個社會，所以我好少去掂佢（政治），印度嗰啲我都唔講啦，更何況香港嗰啲。」
他後來才知道電影涉及認真的政治題目，Stephen即問他當時是否已經不可以推戲？喬寶寶坦白地說：「咁其實可以推嘅，係可以嘅，不過之前我都拍過（警匪片）啦，《PTU》我又拍過啦，呢個角色講我係仇警嘅，對香港、政府、紀律部隊不滿嘅。但係我覺得做戲同本身個人，第一我唔係政治人物啦，我都係鍾意畀歡樂香港人啦，香港呢10幾年，香港人個笑容減低咗好多，出面灰暗暗，香港要多啲正能量呀。」喬寶寶再次強調自己不是政治人物，而且是個政治冷感的人，他說：「我唔係劉德華、我唔係周潤發，好難揀到角色。好似呢5年喺三色台機會好微，咁突然喺電影有個機會，我又唔係淨係拍《時代》，我仲拍咗個印度同香港合拍嘅電影叫《My Indian Boyfriend》。」
Stephen聞言後表示要向喬寶寶說故事，但鬼馬表明自己並非為他護航：「大家都知羅蘭姐係好虔誠嘅天主教徒，佢都成日做神婆，但係唔代表佢信嗰啲。」喬寶寶大表認同，他表示會面對負評：「我自己覺得一個天空下，大家都係一家人。我都多謝香港人對我嘅支持，香港百幾年歷史，冇一個南亞裔、印度人全職演員，我都係諗住喺三色台、中華民族一個最大嘅舞台做戲畀啲子子孫孫睇。我其實冇諗住入行，平日都好少睇電視，就算真係有機會，我睇亞視多。」Stephen即附和說：「我未喺無線做嗰陣都好少睇，就算睇都係睇Pearl（明珠台）多。」
接着，喬寶寶把話題轉到移民蘇格蘭，他認為當地人對有色人種較友善：「每個國家都有歧視，係好自然嘅其實，但係我哋都要面對個難處，最後揀蘇格蘭因為啲樓平。」在蘇格蘭開餐館的他，道出印度人與香港人做生意之間的矛盾：「因為印度人係最叻計到盡，香港人就賺到盡，所以做生意呢都會有矛盾。」
Stephen又趁機問他對於警民「矛盾」的看法，喬寶寶直指是政府及政策問題：「好多嘢，我本身係懲教嘅，所以警察好多inside story或者佢哋嘅rules and regulations，我唔會知道晒。」他自爆現時影合照亦會小心，喬寶寶說：「其實我兩邊（站台）都有去過，不過而家見到政治人物，唔好理邊個立場，都會睇睇。其實最近都有人叫我攞個banner，我睇到『咦？個名係嗰啲政治人物架喎。唔好啦，大佬。』我覺得咁樣會畀人覺得有一個party，我冇顏色之分，如果你特登push我去一個colour，我就唔鍾意。」
Stephen即為他打圓場，說：「如果你係嗰個顏色冇所謂，最慘畀人油上去就唔抵啦嘛。好似上次梁漢文，個傻仔真係陰功吖，影咗張相之嘛。」其後，他邀請喬寶寶唱張國榮的《沉默是金》，Stephen說：「呢首歌，可能好啱佢而家嘅心情。」
喬寶寶在節目中透露與太太是盲婚啞嫁，笑言想不到八十年代印度的photoshop技術已經很高：「講笑啫，佢真面目OK嘅。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|
