林作經常語出驚人，他昨日又在社交網借電影《黑豹》（Black Panther）男主角查特域克保斯曼（Chadwick Boseman）的死訊抽水叫人及早買保險，他留言：「45歲就大腸癌過身。疾病無從預測。一定要早啲check。check之前，記得搵#林作保險。」林作連查特域克終年43歲資料都搞錯，雖有網民指正卻堅持不改。
林作大抽死人水，惹來網民負評如潮，「枉你讀飽書成為專業人士，但一點同理心都無，要賣保險都唔應該利用死者」、「人做保險你做保險做到你咁無品」、「我第一次見咁嘅人，希望第日你有咩嘢事，你啲保險同行會第一時間彈出嚟拉客。」連杜汶澤的《喱騷》都不屑出文揶揄林作的黑心營銷手法是「黑sell」，林作仍冇有怕死撐：「認真討論，其實有咩問題？咩叫消費人嘅死訊？咁在生時做任何電影、廣告宣傳，叫唔叫燃燒緊嗰個人嘅生命？死咗就突然變消費佢？同，消費又有咩問題？佢本身係公眾人物，死訊係公開嘅，你有份睇到關於佢死亡嘅新聞，你有冇份消費？佢在生時做任何嘢都冇人話消費佢，咁耶穌死咗，傳教嘅日日夜夜都講緊佢嘅教義，又叫消費基督教呀？」
才子王貽興昨日網上悼念查特域克，其後看到林作的抽水文，王貽興都忍不住撰文狂轟：「就算啲人懶係智障話佢，其實幾識反向宣傳都好，病毒行銷都應該有底線，底線就係對於逝者嘅尊重，有啲水唔應該抽，有啲唔適當嘅說話唔應該講，講少句唔使死，世上有啲嘢，唔係話咬文嚼字，同人拗咩在生時講佢就唔算消費咩？點解死咗就唔講得甚麼甚麼。」王貽興鬧爆林作借死人賣保險，枉他曾在英國留學：「連呢啲基本禮儀都唔曉，係咪令壽堂臨瞓前冇摸住你個頭同你講，你就唔知原來逝者要懂得尊重？唔知咩叫同情？見你覆每個留言都係小學雞嗌交。呢啲死人財你都想衝出嚟發，係咪真係咁撈唔掂呀？令壽堂俾你丟晒架，自己眠乾睡濕就係湊大個讀屎片嘅裙腳仔出嚟，諗起都戥佢傷心。」不少網民認為王貽興的說話非常有道理，大讚鬧得好：「重點你都說出來了，不帶一句穢話，句句擲地有聲。」
王貽興謂林作丟阿媽架，林母Lily被拉下水，她今日短訊回覆《蘋果》時撐仔：「王貽興係邊個？我唔識。我都當佢的話廢，若干年後，睇邊個是裙腳仔？唔好太早落結論先。天有不測風雲，人有旦夕禍福，我想林作講的意思是如果有保險在生，對死者和生者都是一種安慰，希望在這個世上大家少點痛苦，多點快樂。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|
