何韻詩和黃耀明今日分別在個人社交平台撐《蘋果》及聲援被捕的周庭。兩人連發多個post，阿詩凌晨轉貼《蘋果》直播出版印冊過程，並留言：「你哋撐住香港，我哋撐住你哋。感謝壹傳媒上上下下每一位。」之後再發帖文，寫道：「印一千萬份都同你哋買晒佢。」今日中午，阿詩再轉貼市民排隊買《蘋果》的報道，再留言：「頂想喊死我咩，未試過睇人排隊買報紙咁感動。#真係應有此報。」
明哥今早亦貼了手執《蘋果》的相片，留言：「臨瞓前走咗落街買兩份，如果唔係我會瞓唔着，其實又點會瞓得着呢！我哋瞓唔着時，邪惡嘅政權都唔會有覺好瞓！外國勢力並不需要你去勾結；同理心與惻隱之心人皆有之，世界在看，世界會繼續與港人同行，我們並不孤單。買了兩份：一份撐蘋果；一份撐周庭及年輕的手足們。天佑好人。#他不過想要愛差點上斷頭台#撐蘋果日報」
明哥昨晚也轉發了周庭被捕的消息，心痛表示：「Look what they’ve done to our kids---Agnes Chow Ting under arrest.」
而阿詩亦表示：「今夜無比沉重。突然想起一個月前初選日，完成拉票，由大埔兜埋周庭去黃大仙票站，路上個傻妹好興奮咁忍唔住同我哋成車人講：『你哋有無發現我個頭唔同咗？我人生第一次染頭髮啊～』說時一臉稚氣。。。呢啲先係二十三歲女孩該有嘅生活點滴吧？大時代中總係會想起無聊小事情。先發現能有閒情說說笑笑，已是一種奢求。願今日被拘捕嘅眾人，以及由上年開始仍被扣押嘅手足們，今夜往後都能安好。天佑香港人。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|
