2020年9月23日星期三

滙控股價狂瀉林盛斌心痛輸多少：唔放棄堅持到底 #林盛斌

滙控股價狂瀉林盛斌心痛輸多少：唔放棄堅持到底

林盛斌投資失利，着住一條泳褲面對遊艇乸口乸面!

藍籌滙豐控股的股價昨日狂瀉跌穿$30關口，創逾25年低位。林盛斌(阿Bob)向來將搵返嚟嘅辛苦錢保守投資，今年4月曾在社交平台透露以$40買入1200股滙控，點知目前搞到一地玻璃碎成為輸家。對於滙豐控股已風光不再，阿Bob昨日上載一身赤祼上身，着住一條泳褲面對遊艇乸口乸面的嘅照片，仲有感而發留言：「只要滙豐升返上嚟，我就買到㗎嘞！」暗示自己「坐艇」，心痛輸多少。

被網民追問買咗幾多?Bob就話：「多少手唔係重點」，又話：「唔係$30買囉!當穿30時已經冇準備...」又覆網民話：「好彩(輸剩)仲有條褲！」有網民提議他留給細仔或孫兒，他回覆說：「唔放棄就唔會輸」、「等待黎明」、「堅持到底」等留言嚟自我安慰。最搞笑網民建議他先買住隻遊艇...模型先，或者買架潛水艇應景!他認同表示：「終會升上水」。至於持貨唔少嘅薛家燕眼見滙控狂瀉都好無奈，有意趁股價低啲時再入返啲貨溝淡佢。