譚炳文在今年6月確診患上肺癌末期，昨晚呼吸困難，凌晨12時由白車送入律敦治醫院，延至今早11點離世，享年86歲。炳哥晚年一直由女兒譚淑瑩照顧，瑩瑩望老父走得安詳，即安排法師到醫院為爸爸諗經及準備後事。
炳哥好友薛家燕今日接受《蘋果》訪問，她表示：「今朝接到炳哥離開嘅訊息，當然係好難過...其實2個幾月前，炳哥有留短訊畀我，因為佢老人家好有心，每日都會send個訊息『早安』、『注意疫情』之類，每日都會send，風雨不改，然後今次佢就話『呢幾日我要檢查身體，可能會斷幾日訊息，出院之後我會繼續send』，我收到之後即刻話『唔緊要，你休息緊要』，多謝佢關心，然後我就聯絡佢囡囡，問佢情況點，囡囡嗰陣話『而家冇乜嘢』。」
家燕姐又道：「因為個疫情問題，其實我一路都想去睇佢嘅，但佢囡囡都話唔係好方便，佢哋去探嗰陣都要好多重手續，比較麻煩少少，所以一直冇去睇佢，不過我哋一直都有用訊息聯絡。呢排佢身體OK㗎，瑩瑩（譚炳文女兒）話佢尋日都冇事，但係突然間……噚晚半夜抖唔到氣，今朝就離開。」
對於好友離世，家燕姐說：「我聽到當然係好難過……第一，佢真係睇住我哋大，識咗咁多年，第二呢，我《流行經典50年》請佢出嚟唱歌，佢已經好耐冇出嚟唱歌，佢好錫我好畀面，同修哥（胡楓）一齊出嚟表演，都係兩個幾三個月前，仲同個女嚟一齊幫我哋唱歌。唉……好難過好唔捨得佢離開，祝炳哥一路好走，屋企人都節哀順變。炳哥喺影藝界貢獻良多，尤其是喺配音方面，指導同培育咗好多新人，佢真係可以話係『配音王』，聲又靚。佢久唔久都會返去配音，視工作於娛樂，好敬業樂業，好值得後輩學習。」
家燕姐今午返新城開咪做節目時，神情哀傷，被問到有報道指炳哥早前已得悉患肺癌，家燕姐說：「好似係肺有啲事，但我冇問太多。」她大讚炳哥對演藝界貢獻良多，亦非常有心培育新人：「佢之前都久唔久返去配音，我話『乜你咁勤力㗎？』，炳哥話『可以做就去做，做藝人要敬業樂業』，佢真係好好嘅榜樣。」家燕姐對炳哥離世倍感不捨，但明白人年紀大總會離開，問她有甚麼話想跟炳哥講，家燕姐即禁不住三度眼濕濕、雙眼通紅說：「相識4、50年，好懷念炳哥，好感激佢。佢係我哋好好嘅榜樣，我祝佢喺天堂快樂。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|
