一二年，曾航生重返無綫拍劇，而兩年半前生咗囡囡之後，他就更加勤力搵奶粉錢。今年共有六套劇集推出的他，幾乎劇接劇，而其中五套都被安排飾演大反派，成為新一代「奸人王」。
其實，現實中的曾航生，為人斯斯文文，不僅是「愛妻號」，更是「暖爸」，所以最近他就被一間網上賣玩具的公司睇中，力邀他做代言人。日前，他就孖住這間玩具公司的太子女一起拍廣告；而有湊女經驗的他，在攝影棚內與太子女，你追我逐，互相整蠱，玩到癲！
在《十八年後的終極告白》中，奸到出汗的曾航生，o氹譚俊彥入局，最後令他一無所有。
在《黃金有罪》中，飾演黃智賢大哥的曾航生，為爭家產無所不用其極，最終害到自己被判入獄。
力壓黎明
現年五十六歲的曾航生，在九十年代力壓同期出道的黎明，在樂壇勇奪不少獎項，原本星途無限；可是，在九五年，因為唱片公司高層人事變動，令他無奈離開。當時，他就惟有轉行做音樂製作及教唱歌，間中又出埠登台，總算收入穩定。不過，對娛樂圈依然留戀的他，一二年在朋友的游說下，重返無綫拍劇。劇中，他縱使經常飾演反派、賤男的角色，但卻非常入屋；而拍了八年劇集，令他一提起就十分雀躍的，一定是一三年的《神鎗狙擊》。當年，他飾演一個泰國毒梟，窮凶極惡，「當年監製同我講，覺得我外表太斯文，畀人感覺冇乜驚喜，於是佢幫我設計個造型，黏鬍鬚、梳咗個飛機頭，雖然呢個造型完全唔係我嘅風格，但係我真係好鍾意。」
一五年，曾航生秘密與內地女友「加菲」旅行結婚，一八年更誕下女兒曾子桐。為了前世情人的奶粉錢，他搏命中、港兩邊走，在內地教唱歌之餘，又返香港狂拍電視劇。半年前，他就因為接了劇集《兒科醫生》而要留港，現在非常後悔。他眼濕濕的說：「疫情關係，我要長期留喺香港開工，以前拍劇我都可以即日來回，上返去陪個女，o依家為咗套劇，我已經半年冇見過桐桐。雖然每日我都有同佢玩視像，但係錯過咗好多同佢相處嘅機會。」
近年，曾航生一劇接一劇，單單是今年推出的劇集就有六套，包括：《黃金有罪》、《十八年後的終極告白》、《迷網》、《飛虎之雷霆極戰》、《過街英雄》，以及現正熱播的《C9特工》，產量媲美近期「老是常出現」的高海寧；而六套劇中就有五套做奸人，絕對是無綫近年的「御用奸人王」。
曾經在樂壇紅極一時的曾航生，九〇年曾力壓黎明奪得《最受歡迎新人獎》冠軍，而當年黎明只能屈居亞軍。
現實生活中的曾航生，性格內向、斯斯文文；而育有一個囡囡的他，實情是一個「暖爸」。日前，他拍廣告就做回自己，不用再扮奸。
拍廣告當日，曾航生同老闆女Leanne打成一片，二人玩到癲；而Leanne嚷着要騎木馬，曾航生一樣奉陪到底。
|
鍾意就快D Share啦！
|
|
|
