港產片不一定是大製作，亦不一定如大台一樣，用同一批演員。
王喜早前為新晉導演謝樂兒的電影《照單全收》擔任男主角，亦是他繼2016年大陸電影《左眼不跳財》後再次登上大銀幕。今日有網媒《囧報》報道，謝樂兒今次賣樓拍戲，王喜最初仲半信半疑，《蘋果》今日搵過王喜，他透露在接拍前亦不認識謝樂兒，但口耳相傳下聽過導演有熱誠，賣樓賺錢再自編自導自演。
王喜在網媒訪問中透露，以往有聽聞過有人會以賣樓為藉口壓價，今日他向《蘋果》講到今次片酬，他形容是「相當唔錯」，對於導演賣樓拍戲，他就指自己最初的確是抱住小人之心的心態質疑過：「行走江湖咁耐，對呢個行頭都有少少戒心，因為最初都唔識。以前都聽過『我自己賣樓㗎，計平啲啦』，最初都係本住小人之心，會諗係咪壓價藉口。」
王喜說之後一路拍，漸覺慚愧：「有次場戲要喺室內拍，但地點係山旮旯啦咁遠，點解唔係市區租個地方？由市區出發去到都用好多時間啦，一來一回都幾個鐘，我仲幫導演計過數。」王喜之後才知道拍攝地方原來是導演賣樓後租住的單位，仍未入伙，只佈置好房間借出用作拍攝，他說：「床單所有嘢都係佢自己，佢都未用過就要拎嚟拍戲，大熱天時仲要冇冷氣，我仲要好大汗整污糟晒。」
《照單全收》以兩位傷殘人士作為主要骨幹，亦邀請到田蕊妮唱電影主題曲《愛一次》，王喜透露導演邀請到好多人幫手，包括認識嘅教育界人士、學校。電影將於下月在香港藝術中心古天樂電影院上映6場，王喜表示不知道電影會否安排在其他院線播出，但就希望電影可得到來屆金像獎影展的入圍資格。同一時段，深藍電影《時代》話上未上，但仍有藍絲呼籲要爆場睇戲，王喜亦不標揶揄一番：「如果《時代》視我為假想敵，都係一種榮幸嚟。」
被王喜踢爆要賣樓自資拍戲的導演謝樂兒，今日回覆《蘋果》說：「我本身在做行政工作，有統籌和執行開大型活動，所以籌備一套電影不是太困難。拍片一直都有玩開，寫劇本亦有寫開，在我們專頁亦有交代我寫這劇本的來由。其實做一個『人』應該做嘅事，我覺得唔需要解釋，唔需要理由。隨心出發。」
可考慮正式在戲院排期演出？謝樂兒說：「我有搵過兩間一直很支持獨立電影的戲院，但佢哋的回覆係叫我問第間。我再問，我全費包場播幾日得唔得？她們仍然叫我問第間，唔播我呢啲片。我再問，是否我沒有發行商所以唔播，她們的回覆，仍然是叫我問第間。我沒有怪這兩間戲院。她們一直都很支持獨立電影的。我相信是有人自我審查，是職員的問題，不是戲院本身的問題。所以我現在可以做的是，在古天樂戲院播幾日，看看口碑，然後看看可有發行商可有興趣幫忙發行。」
賣樓投資電影可擔心蝕到血本無歸？謝樂兒說：「其實現在有串流平台，要收回部份成本不算太難。我相信如果劇本好差，兩位咁出色的演員都唔會接，講梗係佢哋要under pay。所以如果係一個正常合格的劇本，加演技出色的演員，要收回成本，或蝕少少，我相信不太難。電影對我來說，能夠收回大部份的成本，有資金繼續拍我想拍的東西，我認為對的東西，有意義的東西，對社會有貢獻的東西，已經滿足。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
