2020年10月26日星期一

【頭條獨家】《大海男兒》任務刺激又驚險吳啟洋歐鎮灝葉振弘暈船浪嘔到怕

拍攝過程絕非易事，但Phoebus（吳啟洋）、George（歐鎮灝）及Marco（葉振弘）都表示十分珍惜這個機會。

Phoebus（吳啟洋）、George（歐鎮灝）及Marco（葉振弘）去年參加《全民造星II》，經過一年時間，終於有機會擔正ViuTV正播出的旅遊真人騷《大海男兒》，帶大家遊山玩水，有挑戰性夠搞笑之餘，亦不乏資訊性內容。三子算是熟水性，依然逃不過被製作組玩殘，日日暈浪嘔住開工，即使過程辛苦，但他們都覺得機會難得唔會後悔參加！採訪：杜淑霞、何蔓琪撰文：何蔓琪攝影：張詠森服裝：FIVE CM (IG: five_cm)

George是《大海男兒》導演Mike的忠實Fans，之前對方執導的綜藝節目都有收看。

過程五味雜陳

節目每集會抽籤選出一名「船長」，賦予其指揮另外兩位「船員」的權力，而「船員」需絕對服從。Phoebus參加《全民造星II》成功奪冠，入行前做過模特兒，幕前經驗最多，又是三人中最年長，但竟然只做了一次「船長」，「基本上除咗第一集，我都冇點做過船長，每次都抽唔中。」不過今次的真人騷夥拍《花姐ERROR遊》系列的「癡線」導演Mike，故大家異口同聲都認同「船長」角色只是傀儡，「船長只係幕前最大嗰個，導演始終係最至高無上，佢講咩我哋就要做咩。」

即使過程中有不同要上山下海的挑戰，他們都大呻最辛苦始終是暈船浪，即使食定暈浪丸都冇用。George直認忽略了艇仔暈船浪的威力，Marco補充說：「第二集地點嘅水流比較急，唔用力划船嘅話就會撞到礁石。」頭暈亦令眾人開始嘔吐，Phoebus表示：「有時大家見到鏡頭只得一兩分鐘，其實成隊Crew係要上另一座山拍攝俯瞰嘅畫面，我哋等嘅時候要喺海中心飄流，好易暈船浪，我同Marco就咁失咗手。」George則十集都沒有嘔過，除了比較幸運，全因他在大家最「嘔」心瀝血的一集走咗去瞓覺。Phoebus玩踢爆說：「有集撞正1號風球，我哋要凌晨出海，當時架船好似過山車咁。日出之際，（製作組）捕捉到好多嘔（嘅畫面）。個太陽好靚，但我哋就嘔得好犀利。」

談到最難忘的經歷，三子即提到一個大伏，「啱啱學完自由潛水，導演就話『我哋Enjoy吓，帶大家睇吓香港嘅海，睇吓珊瑚』。」當時他們十分興奮，以為終於有機會可以放鬆，誰知製作組卻帶他們到一個神秘景點，「嗰度有幾十條攻擊力非常強嘅魚，（我哋）要跳落水尋找一啲嘢。危險程度應該係最高，因為連神秘景點嘅老闆見到都好唔放心，老闆仲話冇人試過咁做。」幾乎每集都與船長之位無緣的Phoebus，繼續「黑仔」到底，要接受這個魚池洗禮，令他大呼：「（做水手嘅感覺）就...唔係咁舒服嘅，不過節目需要我都會咁做！」被問到如果再有做船長機會，會對兩位船員下達甚麼指令？Phoebus想也不想話，會叫Marco和George代替他落水，十分搞笑。

渴望回歸初心

在等待與觀眾見面這年，三人各有各搞作，Marco除了繼續上堂惡補跳唱實力，亦參演預計明年播出的ViuTV原創劇《太平紋身店》，「《大海男兒》係我第一個（見街）節目，頭一兩集好緊張，不過同隊友以及製作組都相處得好舒服，適應咗就越嚟越輕鬆。」George和Phoebus今年1月就有份與ERROR合作真人騷《全民來電》，George表示：「《全民來電》係慈善形式，所以成個人比較含蓄，今次放晒個人出嚟，都擔心自己是否Handle到，好彩有導演嘅指導同三（兩）位嘅包容。」Phoebus認為《全民來電》令他對真人騷改觀，「之前對綜藝認識唔深，拍《全民來電》發現實況節目比較適合自己，對戶外去玩、去挑戰有多啲興趣。同埋好榮幸可以同Mike導演合作，佢有表露主持真實一面嘅能力。」

擔大旗體驗過綜藝節目後，雖然仲想試多些其他工作，但講到要在唱歌、拍劇、綜藝、主持四者之間抉擇，George不假思索便說：「實揀唱歌！不過唔係唱情歌，我比較想挑戰Rap。近年香港比較少呢類型嘅歌手，好似台灣嘅周湯豪咁，我目標係將呢類型音樂帶入香港。」他更透露自己有開始寫Rap歌詞，當寫出滿意的作品，一定會放上YouTube同大家分享。Marco亦認同：「就算要四揀一，我都係揀唱歌。始終唱歌係我最鐘意同做得最耐嘅嘢，雖然呢一刻未必係唱得好好，但我願意投放更多時間落去。」至於Phoebus就心大心細話：「我都有啲糾結，但參加《全民造星II》嘅初衷就係因為鐘意唱歌跳舞，我練舞比較多，亦擺咗好多時間落唱歌，所以出歌會係首選。」