陸詩韻下月便加入「女人四十」行列。
「我唔介意踏入4字頭，我都唔係好相信自己咁快40歲，我都keep得OK。我當然覺得自己個樣進化咗，以前有baby fat。」陸詩韻坦言人大了更會扮靚，「識得執靚咗，而家醫學咁昌明，去美容院做吓機絕對有幫助。」她表示不抗拒醫美：「我以前後生，微調打少少Botox都試過，嗰時細個夠大膽敢試，又有美容院sponsor，我見有baby fat都打吓，又真係提升咗。不過一定唔會植入啲嘢入身體，自己唔接受，不過就唔反對人哋去做。」陸詩韻隨着年長成熟，她學會接受不完美的自己。
陸詩韻的硬朗外表，總予人「女強人」的感覺。她自言很蝕底：「出面啲人唔認識我，就會好忌我，以為我好多心計，我做嘢又唔講嘢，唔笑時，人哋又以為我好難相處，我其實係鱷魚頭老襯底。」陸詩韻自問形象上是「女強人」，實則內心是小女人，「如果我遇到有可以依賴嘅人就唔會咁強，冇人依靠惟有be strong，咁先可以保護自己，保護屋企人，係環境令到我要咁強，遇上對嘅人先會有安全感。」她大呻這強勢曾嚇退了不少追求者：「感情空白都同我外表有關，人哋見到你咁強都會卻步，呢個係惡性循環，冇人敢埋身。」陸詩韻發覺這個缺失，近年便開始適度剛柔調節，身邊也出現不少裙下之臣，她承認已有了解中的對象。
揀對象，陸詩韻指小鮮肉不符合資格，「小鮮肉一定唔得，我希望另一半年紀大我多啲，可能我屋企有細佬，我自細照顧佢，我唔想再照顧多個細佬。對方即使細只係一年或幾個月，我都接受唔到，就算佢幾有條件都過唔到心理關口。女士思想會成熟啲，我又生得成熟，我梗係想同老公匹配啲。男朋友成熟啲可以教到我嘢，佢離過婚、有小朋友都冇問題，手續搞得清楚都OK。」
陸詩韻也接受不婚不育主義，沒有這些規限，少了一份壓力。「除非另一半想要生，我生到都會生，自己就冇呢個衝動。雖然鍾意小朋友，但自知湊唔掂，寧願養寵物。早幾年有諗過去雪卵，仲搵埋台灣同泰國嘅雪卵資料，了解咗要打好多荷爾蒙針，打完會變肥，立即打消咗。始終冇急於結婚、生仔呢兩樣推動，我連拍拖都懶懶閒，等天時地利人和。加上感情上嘅創傷，亦令我覺得唔行就唔錯，唔錯就唔痛。」
陸詩韻開列的擇偶條件，令人不禁想到其富豪舊愛曾文能，2007年他們被影到同遊日本令戀情曝光，最終拍拖一年便分手。二人再見亦是朋友，陸詩韻至今仍不時被追問可會舊情復熾？「嗰時我好傻，唔識handle，怕公司同經理人唔鍾意，拍拖唔敢認，結果去旅行時俾記者影到就寫得唔好，自己形象都受損。不過我又唔覺得大家分開係我miss咗個chance，可能係佢miss呢，我唔用呢樣去衡量。」「黃金盛女」陸詩韻續說：「我幾enjoy呢個moment，而家擁有嘅嘢仲多過以前，可能錯過咗好多嘢，但冇錯失過唔會行到今日，跌過起番身個人都強啲，我希望自己係一個有經歷嘅人，而唔係一張白紙。」
陸詩韻近年也營商賣護膚品，生意做得不錯，她自嘲自己工作起來不會停。迎接「39+1」，陸詩韻訂下目標：「我希望45歲前退休，未來呢5年要不停咁去追，我追嘅唔係一個數目，係追一個成功感，希望45歲後自己唔使咁辛苦。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
