黃秋生同老婆吳惠貞結婚28 年，生了兩個兒子。但婚後維持多年各有各住，相處方式好特別！直至今年九月，秋生為減輕負擔，搬離獨居了廿年的大坑私竇後，近日兩公婆先恢復同居。日前《壹仔》發現兩公婆孖住去shopping 。表面好大男人的秋生，原來對住老婆，都有溫柔一面，全程好照顧老婆，去到邊拖到邊，沿途仲有講有笑。兩公婆相處得咁sweet，關係似乎冇受政見影響。
眾所週知，秋生「黃到金」，相反黃太竟然是撐警忠粉。連秋生都話：「我老婆就真係藍到發黑，總之警察就係英雄。真係可惜早知當年我考警察。」現在重新適應同居生活，再加上黃藍政見，能夠融合相處，呢門學問好高深！《壹仔》事後訪問秋生，他用十二真言，道出黃藍夫妻之道。
黃家政見大不同
講到政見，黃秋生屋企同袁彌明一家有點相似。袁彌明同爸爸是金黃，而自稱中間派的哥哥袁彌昌，卻娶了「深藍」的容海恩，搞到一家人唔可以再同枱食飯。至於黃秋生一家，黃生「黃到金」，黃太是「藍血人」，而大仔則保持中立，細仔屬於微黃，一家的光譜好闊！一向敢言的他，近年因為被打壓，在香港工作量近乎零，更試過被大仔嫌他多事：「你又喺Facebook講乜呀？唔關你事，就唔好講咁多嘢為咗屋企⋯⋯」- 政見上，大仔雖然保持中立，但就試過嫌爸爸多事：「唔關你事，就唔好講咁多嘢為咗屋企⋯⋯」
為慳錢放棄獨居
收入大減，身為屋企的經濟之柱，一闊三大。早前秋生唯有放棄租住了廿年的大坑獨居竇，搬返去同老婆過同居生活。92 年同老婆結婚，婚後因為成日有拗撬，兩公婆好快就有共識，過分居生活。以往為了搵食，秋生甚少時間陪老婆同阿仔，佢早排在訪問中自責：「錯過咗好多，例如陪小朋友、老婆、甚至同朋友，錯過咗好多，差唔多錯過晒！」分居多年後，兩公婆再度同一屋簷下，但黃藍夫婦，又可以點相處？除了政見各走極端，秋生曾經講過，兩公婆的價值觀，同處事方式都好唔同。不過作為現代文明社會，擁抱民主的一份子，秋生覺得要尊重唔同理念的人，更何況是老婆！所以兩公婆一唔啱channel，他就選擇唔正面交峰。
- 今年九月，秋生為減輕負擔，搬離獨居了廿年的大坑私竇後，兩公婆恢復同居。
十指緊扣出巡
日前《壹仔》先見到黃藍夫妻拍拖行超市，雖然一直各有各睇，但秋生揀酒的時候，都問一問老婆意見。去超市掃完貨，兩公婆手拖手繼續行商場。行到入體育用品店，黃太掛住揀運動衫，秋生就好有耐性等候。之後輪到秋生睇模型，期間秋同店員不停吹水，黃太就寧願自己去隔離舖頭睇酒。難得影帝大駕光臨，店員要求黃生黃太影合照，秋生當然冇托手踭，不過，黃太就耍手擰，貫徹低調作風。行完街，兩公婆繼續邊行邊傾，十指緊扣行去攞車返歸。事後壹仔訪問秋生，黃藍夫妻的相處學問，他就以十二真言形容：「大而化之，若冇其事，有願冇求！」果然高深！即將要台灣開工的秋生，呢段日子，爭取同老婆孖公仔時間，睇法有咩唔同，都擺埋一邊，唔重要
- 日前秋生孖住老婆拍拖行超市。
- 秋生全程好照顧老婆，去到邊拖到邊，沿途仲有講有笑。
- 秋生揀酒的時候，都問一問老婆意見，兩老婆有商有量。
- 影帝大駕光臨，店員要求秋生影合照，他當然冇托手踭。
《噴火30年壹驚艷 性感女星典藏集》特刊現已出版，各大書報攤、便利店及《壹出版》網店有售，每本港幣九十八元正。
按此購買
----------------------------
守住新聞自由 和你撐壹週刊計劃 每月港幣$300起
按此了解更多
-----------------------------
英國移民、升學、就業、買樓生活資訊！
立即加入「走佬去英國 － BNO 5+1 移民資訊研究所」
來源 source: http://nextplus.nextmedia.com
|
鍾意就快D Share啦！
|
|
|
