2020年11月3日星期二

【頭條獨家】MIRROR慫恿參加《造星III》顧定軒自稱跳舞災難 #造星II

MIRROR慫恿參加《造星III》顧定軒自稱跳舞災難

軒仔以演員身份參加《造星III》，背負着不少壓力和包袱。

顧定軒14年參加電影《愛·尋·迷》入行，6年來參演過多部電影和電視，一直以演員工作為主，最近毅然參加ViuTV的育星真人騷《全民造星III》。軒仔坦承今次因MIRROR成員Jeremy慫恿而激發他挑戰自己那團火，不過當面對比賽確實爆露自己不少缺點，特別跳舞方面極之唔掂，他更堪稱自己是跳舞災難。採訪：杜淑霞

軒仔解釋參加《造星III》契機，就是年初參演ViuTV劇集《男排女將》，「其實前年參加金像獎opening嘅表演，同一班新演員一齊練，嗰時已經喚醒咗自己除咗演戲之外，其實仲鍾意其他表演譬如唱歌同跳舞，同埋好想大家了解一個真正嘅顧定軒。到拍《男排》Jeremy成日叫我參加，其次就係肥仔（ERROR）同埋193（ERROR），因為佢哋喺現場都攞時間排舞練習，我會跟埋佢哋一齊玩，佢哋就話你咁鍾意不如試吓」

對於今次機會，軒仔視為挑戰自己及成長的過程，「我覺得呢個係最適合嘅時間參加，畀啲空間自己喺拍戲以外機會去挑戰吓自己，演戲係要經歷多啲先可以帶到畀演出，或者嚟緊有啲角色需要更多人生嘅歷練，而呢個節目會畀到好多成長我，係一個好大嘅成長課同表演課，我本身跳舞唔叻，又唔係唱歌特別好，呢個節目就係可以逼迫到我哋，爆發自己嘅小宇宙，同埋鞭策自己，譬如拍攝完你仲會唔會返到屋企繼續練呢！？」

軒仔拍《男排女將》時，被MIRROR的Jeremy和ERROR 的肥仔和193慫恿參加《造星III》。

表現不滿爆喊

講到參賽的壓力，軒仔反而認為不是來自觀眾的評價，而是自己給自己背負的包袱，「我着眼點唔係觀眾嘅反應，反而係我自己表演好唔好，我係以演員身份去做呢件事，我係背負住畀過機會我嘅人，如果我做得唔好，係有愧以前畀過機會我嘅人，當然我最希望暫時放低呢個身份，去享受呢個過程，可以演變成一個全新嘅顧定軒出嚟，令自己可以成為更全面嘅藝人。」

軒仔最開心跟其他參賽者相處融洽，「今次大家都好搏，但惺惺相識，會互相幫助同提點對方，又會分享經驗。」不過，始終演出都要靠自己，他坦言跟以往參賽者一樣，都因為對自己表現不滿而爆喊，「其實都喊咗幾次，但盡量唔畀鏡頭影到，唔想咁樣衰，不過呢個比賽真係好殘酷，會令人好心酸，其實大家已經好努力去超越自己。」至於最唔掂的地方，他直認是跳舞，「我堪稱跳舞災難，我以為自己手腳算協調，原來真係唔掂，所以我拍攝完咗會返屋企瘋狂咁練習。」