日前剛度過28歲生日的何雁詩，今日「升呢」做鄭太，嫁給鄭俊弘，一對新人假沙田某酒店舉行結婚儀式。何雁詩的一班好姊妹，包括陳瀅、陳嘉寶（Anjaylia）、賴慰玲、蔡思貝、Super Girls的吳嘉熙（Cheronna）及張子丰擔任姊妹團，至於張頴康就做兄弟，陪新郎去接新娘。
鄭俊弘與何雁詩於下午3時多現身，10男10女兄弟姊妹團列隊迎接一對新人，鄭俊弘親自駕着保時捷跑車載老婆到場，他們穿上中式禮服，至於姊妹隊就化身pink lady，兄弟團則以西裝look上陣。
何雁詩的行頭十足，除了有一串金豬掛頸之外，手上另有5對龍鳳鈪、金戒指及3隻鑽石戒指，其中一隻由奶奶所送，十分搶眼，另有一隻是求婚戒指。鄭俊弘及何雁詩應記者要求咀嘴拍照，錫足幾次都有求必應。
一對新人受訪時，何雁詩表示沒想到是鄭俊弘先喊：「估唔到佢眼淺過我，我以為我眼淺啲，睇住佢講愛的宣言都估唔到佢喊。」何雁詩自爆愛的宣言是自己寫給鄭俊弘去讀，是姊妹設計的部份之一，內容有些只有兩人會知，所以聽到後都會會心微笑：「有啲感動、有啲搞笑，其實最主要係互相廝守，同埋佢長命過我。」
鄭俊弘則謂沒想到自己那麼快喊：「但真係有啲感動位，玩遊戲已經想眼濕濕。」問他宣誓時會否喊？他就話：「可能會。」他們都謂今天進行得好順利，本來預計打風，但幸好最後天公造美。提到他接娘時用了8位數很豪爽，他笑言是鏡頭效果：「不過私底下個數都好得體。」而何雁詩則指事前已跟姊妹溝通過，問到愛的宣言是由何雁詩設計的，那聽老公時會否覺得無驚喜？何雁詩說：「唔係呀，佢演繹得好好，加上佢嘅眼淚，加多個飯盒畀佢㖭！」不過兩人又謂各自有寫愛的宣言，會留待行禮時才讀。
講到新娘手上的鑽戒，鄭俊弘說：「其實已經送咗求婚戒指畀佢，頭先媽咪亦都送咗鑽戒畀佢。」何雁詩坦言：「好開心，過完大禮之後大家就互相加入對方嘅家庭，因為雙方家人都睇住我哋起起跌跌，而家真係嗌奶奶同大姑奶。」
問到他們的造人大計，鄭俊弘稱：「其實個個都咁講，大妗姐啲說話都好好聽，話生5仔2女，不過呢啲冇咁快，等我哋遲啲先計劃，未諗到細路嗰邊住。」何雁詩笑言：「唔知自己有冇咁犀利，可以生到5男2女。」
講到10號是鄭俊弘生日，他指：「嗰日要開工，但老婆已經準備咗嗰晚會食飯，book咗場地。」何雁詩笑說：「係呀，計劃佢個生日飯仲忙過我哋個婚禮。」
雖然武漢肺炎疫情近日有稍為緩和的趨勢，但仍有限聚令關係，所以他們今午的婚宴只邀請約50名親友出席見證，而他們今晚於大埔設的婚宴，則有約70人獲邀參加。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
