正所謂十年人事幾番新，在上一個十年， 𡃁模的出現，的確製造了不少茶餘飯後的話題，一眾燕瘦環肥的女生，用不同的途徑加入娛樂圈，為了爭取曝光率，她們施展渾身解數，有的以逼爆身材做賣點，有的以騎呢行徑吸睛，結果成功搶灘的人不多，反而淪為被消遣的對象，但似乎未有嚇怕少女心，仍然為不少人奮不顧身地追求夢想。曾經先後以主持和監製身份，炮製旅遊節目《霏雲闖蕩》、《阿美利堅有外星人》系列、《初度遊》、《玩·謝我阿婆》，有「旅遊達人」之稱的周雅霏，在2011年曾經參加中國小姐，當時獲得最佳氣質獎，不過在娛樂圈短暫停留後，發覺𡃁模的身份並不適合自己，最後決定抽身離場。
日前周雅霏應《蘋果》邀請，與友人媽咪Fanny在坪洲遊覽地道的旅遊景點，出發前夕，周雅霏做了一輪資料搜集，她坦言覺得坪洲比南丫島平實，更加有「屋企」的感覺。當日周雅霏邊行邊聽Fanny介紹坪洲的歷史，其後她們去了永安街、牛皮廠、看陶瓷和吃南乳餅。
儘管有不少人覺得選美出身的人，被標籤為無腦、賣弄身材、貪慕虛榮，不過周雅霏並未有後悔，反而覺得這份經歷對她非常重要：「嗰陣都係18、19歲，咁細個咪心諗乜都試吓囉，參加比賽又冇嘢會lost，當係一個見識，我反而覺得喺過程幫助到而家嘅生活，好似識咗好多人，知道點樣喺職場做事嘅方式。」當時她在娛樂圈工作做了兩年左右，發覺自己似乎不適合在娛圈生存，到了2013年，周雅霏決定另覓自己的天空，她與女攝影師好友小雲合作拍旅遊節目《霏雲闖蕩》，結果令人生有一個新轉變：「因為我做唔起𡃁模。首先唔係你想，等同於人哋就會接受你，影得寫真，都要有人buy你先鍾意；再加上我覺得自己唔係好有𡃁模嗰種觀眾緣，唔係嗰種路線，好多嘢都相輔相成，人哋都唔鍾意，無謂強求呀！」
不過她未有因為際遇未夠其他人好，覺得迷失和挫折：「喺𡃁模、模特兒同藝人方面，反而冇好大迷失，我自己都好接受呢樣嘢，知道自己唔係食呢行飯。我自己都係一個好有主見嘅人，知道自己鍾意旅遊，所以當啲人話我係旅遊達人周雅霏之後，我都好開心，我唔一定要喺嗰個方面要人哋認同，反而喺旅遊方面可以有一個定位，覺得好開心。」作為第一代旅遊達人，周雅霏的確吸納了一班fans，不過隨着機票越買越平，開始很多人裸辭走出去闖蕩，反而令她一度迷失了自己：「旅遊達人原來係一個好容易講嘅名，嗰陣唔知自己可以點算，後來我索性停咗一排，冇刻意去搵job，有人搵先再接，仲有一刻諗過放棄。屋企人知道都有安慰我，佢哋話做得專業嘅人，冇番十年八年嘅經驗，都唔可以話自己係專家，慢慢再諗吓，又係喎，其實我都唔係去過好多地方，當初只不過係20零個國家，又唔可以算係專業，我又真係好鍾意呢樣嘢喎，冇理由放棄呀，所以咪諗吓有冇嘢可以融入去。」她續說：「有朋友問我自己最想係乜嘢，我話最想係探索呢個世界，再諗吓其實唔一定要喺鏡頭前面以主持形式去做，喺一個好睇嘅節目，要有一個好嘅主持去carry，所以咪諗唔一定要自己做主持，就算喺幕後做監製，都可以去旅行，慢慢咪向呢個方向去諗。」
經過多年的努力，周雅霏終於有自己的工作室和團隊，對於在這10年間轉變，她笑說：「自己成長好快，唔係話經歷好多挫折，反而係有好多機會，自己好感恩，喺人事方面、旅遊節目同觀眾，接受全新嘅我，好接納呢個身份，做咗媽媽之後，亦學咗好多。」她更感激先生支持：「佢係好free嘅人，見到我圍住自己嘅夢想而行，見證咗我嘅成長，望住我嘅轉變，由零開始，到開公司，有自己嘅團隊做節目，佢好戥我開心。我好希望做一個節目，觀眾可以get到我嘅message，而唔係只係睇到喺度吃喝玩樂。」不過目前她坦言面對另一個嚴峻的難題，就是疫情：「其實上年年尾才接，所以工作都停晒，等同冇一樣，我自己都冇plan，唔敢畀太大希望，我哋仲俾人拖數，有6位數字，我都明白大家處境，所以喺呢段時間都試吓轉型，開咗個媽媽節目平台，多咗嘅時間就用嚟陪個仔。」
撰文：唐琛悠
攝影：沈健程、廖達燊
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
