英皇娛樂新人艾妮（Elly）人靚歌甜，上月推出的發燒碟《Closer》賣個滿堂紅，老闆楊受成決定再下一城，推出黑膠碟。女神外表純如蒸餾水，原來她是美酒的愛好者，每天都會飲杯紅酒放鬆心情。
本刊到她位於太古城的香閨參觀，喜歡斷捨離的她，全屋簡約風格；不用工作的日子，她便會躲在一百五十呎的工作室中歎美酒及練歌，完全是宅女一名。
擁有四十三吋長腿的Elly，樣靚聲甜，絕對是樂壇的可造之才。
護士變歌星
近日頻頻在無綫音樂節目亮相的英皇新人艾妮（Elly），一把天籟之音，令人耳朵懷孕。其實，Elly畢業後便投身醫護界做護士，在學時期曾參加過第三屆《超級巨聲》，更於一八年推出發燒碟《Dreamy》，不過都只屬玩票性質，她笑說：「自己喜歡唱歌，所以先參加《超級巨聲3》，但比賽之後，家人唔想我收入唔穩定，所以畢業後先做咗護士，喺呢六年註冊護士生涯中，我一直都有part time唱歌，做酒店駐場歌手。」
家人有見Elly對唱歌的熱誠，終於在去年支持她全身投入樂壇，她表示：「三十歲先起步，的確係遲咗，但我會把握時間，唔會浪費每一分每一秒，努力增值自己，追上去；而且，做護士時已經練得一身鋼鐵體質，所以好捱得！」
為了方便工作，原本與家人同住新界的Elly，一年前就搬到太古城的五百五十呎、兩房一廳的單位。Elly雖然喜愛購物，但卻希望家居以簡約風格為主，她笑說：「我都真係買好多嘢o架，當屋企好亂嘅時候，我就會斷捨離；而掉嘢嘅過程，就發現自己使咗好多錢，買埋好多唔等使嘅嘢。而喺選擇掉邊件衫嘅過程裏面，確實幫我好多，就係控制自己嘅購物慾。」
工作室放置了很多錄音器材，方便Elly隨時練歌。
Elly最注重湯水，每個星期都總要煲湯一至兩次。
不胡亂出街
五歲已經開始學彈古典鋼琴的Elly，將其中一個房間變成工作室，內裏除了有樂器，更有錄音設備。
她解說：「做歌手一定要經常練歌，所以我一般喺屋企，大部份時間都會留喺呢間房，聽吓歌、錄吓音，又會用監聽嘅喇叭同埋耳機，自己聽番自己唱， keep住個水準。」
自從做了歌手後，Elly生活變得更檢點，昔日會素顏、踢拖出街，現時為顧及形象，不會胡亂出街；加上疫情嚴重，她盡量都會留在家中，她直言：「非必要都好少出街，不過呢度係我人生第一次自己搬出嚟住，所以都會經常招呼朋友上嚟打吓邊爐、煮吓飯。因為有朋友上嚟，我就會煮多啲嘢，自己一個人平時就好簡單，會叫吓外賣就算。為咗有多啲鑊氣，我搬入嚟之前，專登睇吓廚房係唔係用明火煮食，先決定租唔租。我比較鍾意煮中餐，因為西餐比較多澱粉質，好肥o架！」
Elly續說：「另外，我又鍾意煲湯，煮下淮山補身，約一星期煲兩次湯，做女仔一定要養生。」雖然與家人分開住，但她堅持每個禮拜都會回家一日，食住家菜兼飲媽媽煲的靚湯。
飲靚酒減壓
Elly不僅喜歡飲靚湯，更喜歡飲靚酒，為了令自己加深對紅酒的認識，她更曾到波爾多的酒莊考察兼上堂。提到紅酒她就非常雀躍：「我真係好鍾意飲紅酒，出嚟做嘢就開始嗒番兩杯。因為做嘢太大壓力，放工就會同朋友一齊出去飲吓嘢，傾吓偈紓壓；不過太嘈嗰啲酒吧，我係非常抗拒。o依家唔係返固定時間嘅工作，我就會夜晚自己喺屋企飲一杯紅酒歎吓，跟住睇吓電影、睇吓書，咁就一晚啦。」
在九月尾推出大碟後，Elly在香港唱片商會銷量榜中，一直都在前四名內。
懂得斷捨離後，Elly已經盡量減少買東西，一般出活動都是借贊助衣服，用完一次便歸還，所以衣櫃存放的服飾並不多。
|
鍾意就快D Share啦！
|
|
|
