2004年港姐亞軍朱慧敏（Queenie）今日被《蘋果》在婚姻註冊處發現與養和醫院心臟科專科醫生陳良貴（Jason）入紙申請註冊結婚，二人報稱住址在半山司徒拔道，其後Queenie回覆表示謝謝大家的祝福。近年Queenie在幕前的演出不多，除了去年曾參與ViuTV劇集《地產仔》外，在2018年與王賢誌（Vinci）合作演出舞台劇《金星撞火星》，兩人更因此而成為好友，不時與一班朋友相約見面兼齊齊旅行。
Vinci今日接受《蘋果》訪問，談到Queenie即將結婚，他坦言戥對方開心並說：「聽到呢個消息好開心，真係恭喜佢哋，雖然我哋喺TVB做過同事，但係嗰陣都唔係太熟，估唔到隔咗多年，因為做舞台劇反而熟咗，佢又介紹埋男友俾我識，同我啲朋友又幾夾。嗰陣Jason都有一齊去西藏，當時仲有其他朋友一齊去，Jason好細心帶咗好多藥物俾其他團友，以防不時之需，沿途又好照顧大家，我都覺得呢個男仔好好。不過可能佢哋係啱啱開始，所以未算係好熱烈，隔咗幾個月我哋又一齊去黃刀鎮睇北極光，但係呢一次唔係全程一齊，主要係一齊睇北極光，之後佢哋兩個去咗其他地方玩。舊年因為疫情少咗見，最多只食過幾次飯，始終Jason做醫生，所以佢都好小心，唔敢同太多人接觸。」
至於會否得悉婚禮的詳情，Vinci說：「唔知，疫情關係大家都好頭痛，我都唔知佢哋嘅方向係點，我等佢哋邀請，睇吓佢哋有乜嘢諗法，祝福佢哋喇，Queenie係一個好好嘅女仔，識咗佢先發覺之前啲負面嘢似乎唔係好關佢事，佢有時都會send吓message俾我，好似天氣凍，提吓我要着多件衫，好warm。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
