由曾國祥執導的電影《少年的你》，成功入圍奧斯卡最佳國際電影最後5強。曾志偉今日在將軍澳出席記者會時，笑言冇信心阿仔會攞獎，不過能夠入5強已當贏。
志偉指得知阿仔的電影入圍最後5強，一家人都覺得開心及非常震撼，女兒曾寶儀一直觀看奧斯卡提名直播，得知入圍後最開心及最大反應，志偉說：「阿寶係最開心嘅，佢喺台灣打電話畀我哋尖叫『啊~』，好好笑。我都有打電話畀個仔，佢話『老竇，犀唔犀利？光宗耀祖喇！』我話：『吓！我都唔夠光宗耀祖？你仲光宗耀祖過我？』。」志偉又笑言阿仔最近要忙住跟其他人慶祝，還未輪到自己與他食飯。問到志偉有沒有信心阿仔攞獎，他坦言很難：「因為我知道嗰4部（提名電影）都可以話係強中之強，我覺得入到最後5強已經當攞咗。」
志偉普通話受訪時，表示曾國祥因為疫情未能到美國出席奧斯卡頒獎禮，但接受廣東話訪問時卻表示「可能」去唔到，不過他又笑指曾國祥到時無論得獎與否，他也是一個幸運同不幸運的導演：「舊年金像獎攞最佳導演頒唔到畀佢，今年又疫情，可能未必去得成，但點都開心，因為係一件大事。能夠入到最後五強，都係一件大事，亞洲電影係比較少，所以今次嚟講都算係為香港增光。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
