同周慧敏十指緊扣壓「波邊」 伍仲衡唔驚倪震呷醋
《伍仲衡搞乜花臣音樂會》昨晚來到尾場，請來周慧敏、王馨平、布志綸、羅敏莊等擔任嘉賓。伍仲衡透露前晚舉行頭場演出時，因超時被罰5位數，由於場館只開放5成入座，他笑指未能回本，又叫觀眾捐錢給他。女神周慧敏連續兩晚擔任嘉賓力撐好友，二人合唱時，伍仲衡又口花花：「如果我早啲識你，倪震就有對手。」之後二人擁抱，身穿露肩長裙的周慧敏笑稱：「你唔好壓扁我（件衫）嘅波...浪邊呀。」伍仲衡同周慧敏在台上又拖又攬，坦言唔怕對方老公倪震呷醋。
布志綸昨晚演唱《一生不再說別離》懷念已故太極樂隊鍵琴手唐奕聰，一度感性落淚，轉身拭淚，場面感人。而昨晚擔任encore嘉賓的方皓玟，她直言把伍仲衡視作恩師，自爆當年收到《分手總約在雨天》的編曲時開心到喊，伍仲衡卻繼續發揮搞笑本色：「幾驚妳話難聽到喊。」之後又大讚方皓玟是靠個人實力讓人認識，即使背後沒有大公司支持，默默堅持做自己，很開心看到她成為最受歡迎女歌手。音樂會最後兩度encore，於12時05分結束。
完騷後，伍仲衡表示兩場音樂會都超時，未知實際會被罰多少錢，不過連同網上觀眾的收入，預計能夠打個和，問到如在紅館開騷會否賺多啲？他謙虛表示自己有排都未上到紅館，但作為音樂人會視紅館為目標而努力，他亦希望開作品展，但要等到適合時機。提到他與周慧敏在台上擁抱又十指緊扣，他直言擁抱是周慧敏主動的：「我將首歌改咗歌詞，最後兩個字係擁抱，佢聽到就問係唔係要擁抱，佢都問到我只好接受啦，但十指緊扣就係我自己想嘅，男女合唱好正常，我一直當佢係姐姐，佢都好支持我，喺台上都係純粹搞氣氛。（唔怕倪震呷醋？）唔怕，我哋好熟，倪震好放心我哋一齊做嘢。」
來源 source: http://hd.stheadline.com
|
鍾意就快D Share啦！
|
|
|
