集影后與視后一身嘅「單身貴族」鄭裕玲（嘟嘟）雖然經常公開「追星」生活，不過私生活就好低調，絕不公開其香閨面貌，不過原來以前佢就曾帶大家「睇樓」，當年大約27歲嘅佢接受無綫《K-100》節目訪問時，罕有詳細介紹其豪宅！
出名Taste好嘅嘟姐，當時居住喺何文田，非常整潔，大玻璃窗設計可以望住開揚景色，客廳掛住富色彩嘅電影海報嚟突顯簡約嘅客廳，嘟嘟又着上Deep V家居服親自示範瞓喺客房睇書嘅情景！高貴大方嘅嘟嘟喺布置上更落足心機，除咗擺放喺尼泊爾帶返嚟嘅古董燈、又喺書房擺咗16個金木，每一個都係《三國志》中嘅人物，充滿書卷味道！而衣帽間直情係Studio級數，三面都有鏡，可以照爆鏡先出門口呀！連廚房設計都唔馬虎，用玻璃磚砌成一大片牆，加埋幅海景畫，夠晒有情調！
雖然一個人住咁大間屋，但嘟嘟話好享受，自認係宅女：「我覺得係賞心樂事，另外我又唔鍾意出街嘅，所以呢喺度睇吓書、飲吓茶，傾吓電話，我覺得好開心㗎！」
來源 source: http://hk.on.cc
|
鍾意就快D Share啦！
|
|
|
