2021年8月7日星期六

【太極演唱會】等足兩年紅館開騷雷有暉抱正能量：堅持夢想 #太極

【太極演唱會】等足兩年紅館開騷雷有暉抱正能量：堅持夢想

太極的紅館騷數度延期。

太極樂一連兩場的「Rainbow After Rain演唱會」今晚於紅館開鑼，吸引不少圈中人捧場，包括Rubber Band成員阿正（馮庭正）和太太黃淑玲、鄧建泓和太太石詠莉、麥家瑜、蘇志威、阮兆祥、劉威煌、海俊傑、黃劍文、羅沛琪等入場欣賞，而最近盛傳蜜運中的泥蜢就單拖現身，未見其緋聞女友黃心穎。

太極獻唱經典歌曲《沉默風暴》為個唱掀開序幕，更要求觀眾齊齊起身一齊唱。雖然隊員Gary Tong於去年不幸離世，但台上未見有紀念Gary的擺設出現，相信正如太極之前接受訪問時表示「Gary在心中」。

由於個唱受疫情影響而數度延期，主音雷有暉（Patrick）分享感受時說：「你哋好叻呀！係咪等咗好耐呀？有冇掛住我哋！我哋都好掛住你哋，其實唔係等咗好耐，兩年啫。知有你哋響度，我哋企返響台，經歷過好多波折起伏同好多事，真係好配合個騷個名，但只要大家堅信、堅持自己夢想，要有信心對未來抱有正能量態度就一定會做到，本來個騷35周年，依家多咗一歲，但係我哋個樣無乜點變。」雷有暉又搞笑讚Joey Tang外表沒有改變，Joey Tang又指Ricky都沒有改變，雷有暉加把口笑Ricky連眼袋都消失。