李蘊入院切除脊椎腫瘤 老公陪伴在側行動澄清無家暴
李蘊自2015年嫁給內地金融才俊羅章冠後淡出幕前，日前因她上載一張抽血相，透露要入醫院做身體檢查，竟有網民指她遭受家暴，激到李蘊「紮紮跳」。昨日她在社交網貼出躺在醫院病床的照片，遠處見到其夫坐在窗旁的梳化上講電話，而她又在限時動態連環出Po，交代自己因脊椎腫瘤入院，似是為家暴一事闢謠。
自言手術完成返回病房的李蘊，留言感謝祝福，並透露要吊消炎止痛藥，又因有尿喉及引流管，因此有兩、三日不能落床，不過可以玩電話，只是麻醉藥剛過會比較攰，她撰長文交代為何事入院：「我pat pat上面右邊舊骨痛咗幾個月，平時唔痛，係跑步／跳起／運動先痛，一路都以為生完小朋友有時又要抱，腰酸骨痛係正常，無理佢，上星期五心血來潮去睇吓醫生，醫生話似坐骨神經痛，不過叫我照下MRI（磁力共振）會清楚d，咁照啦，一照就發現有粒1x1.6cm嘢係胸椎椎管入面，即係脊椎腫瘤，我第二日就去大醫院搵大醫生睇清楚，第三日就入院同做各樣深層次檢查，今日就已經全身麻醉切咗粒嘢。」
李蘊指要等化驗結果才知道「粒嘢」是甚麼：「因為係黐住神經，所以無得做微創，醫生話傷口5cm左右，哇！我個美背啊！哈哈～而家傷口好痛吓，呢幾日要平躺，枕頭都唔可以用，食痾玩瞓都係床，過多幾日就可以出院㗎大家身體最緊要，有唔舒服唔好等、唔好忍，真係睇咗醫生先，及早發現及早治療，大家一定要身體健康。」
本文作轉載及備份之用 來源 source: http://hd.stheadline.com
|
鍾意就快D Share啦！
|
|
|
