認疫情影響工作：公司連出歌都會有擔憂
不論面前迎來甚麼難關，Stephanie第一時間會提醒自己要保持冷靜：「呢一點好緊要，如果你好心急咁做任何決定，呢啲決定都未必係最好。當你冷靜落嚟，自己嘅心態變得穩定，好多嘢都會迎刃而解，搵到解決方法。」她認為專注當下，做好自己，才能在疫情中好好調整自己：「可能喺工作上，公司連出歌都會有擔憂，擔心出咗歌之後可以點做，未必可以開show，未必有公開活動可以宣傳。當然會有少少氣餒，但係我同自己講，無論手頭上有咩困難，都要有一個好嘅心態，用呢個心態做到最好。」她一直以正向心態面對工作，直至年初收到主辦方邀請開演唱會，她認為現在總算撐過了人生其中一個低潮，更相信專注做好自己的重要性。
為樂迷大唱Side-B歌曲
在商量演唱會歌單時，Stephanie坦言自己與製作團隊有著幸福的煩惱，相比思考如何包裝演唱會，他們所煩惱的卻是如何在每一個段落中作出取捨：「自己覺得有好多歌都需要喺呢個show度唱，樂迷一定會有期待。透過『Truth And Dare』呢個主題，我哋諗到好多好有趣嘅主意，好想試，而嘉賓呢部份都係可以有新鮮感同火花嘅地方，但係依家好似太精彩，所以我哋都好似講笑咁話唔知應該刪減邊啲部份。」今次個唱只開一場，Stephanie當然覺得未夠喉，她也希望延續今次演唱會的主題開Part 2：「依家啲歌係多到要諗點樣取捨，其實係多到，如果有一個Part 2，裏面可以有嘢係唔同嘅添。將我哋諗到嘅所有嘢都放喺嗰個show度，可能大家睇完Part 1再睇Part 2，然後Part 2係有唔同嘅嘢睇添。咁當然最好，因為開show真係好好玩，希望觀眾可以一齊感受。」
懷疑《斷片》冇派台係錯誤決定
為了滿足忠實歌迷，今次Stephanie也特意挑選了一些Side-B作品送給他們：「如果我係樂迷嘅話，我都會有呢一部份嘅期待。喺以前嘅大碟年代，有啲歌佢哋有聽過，但係未必係派台歌，就會少啲機會喺現場聽到。我成日都見到有啲歌係有網民留言話好想聽到，真係要滿足下佢哋，今次係一個好好嘅機會，係一定要做，呢件事已經擺咗好耐。」眾多作品中，她最記得一首沒有派台，但深受樂迷歡迎的《斷片》：「《斷片》有段時間係成日都有人講，講到好似係主打歌咁，心諗嗰時冇派呢首歌係咪做咗一個錯嘅決定呢？（笑）佢哋嗌到嗰首歌好似主打歌咁。」
從教育系作品自癒
藉著自己與黃偉文（Wyman）合作的「健康教育四部曲」，自己也被樂迷封為「教育系歌手」，Stephanie坦言過去也曾經從自己作品中得到力量：「上年好窩心、感動，有樂迷喺《多喝水》之後就話我係『教育系歌手』，我自己諗諗一層，呢啲歌都係教育緊我自己，喺不同嘅狀況中應該點面對，或者遇到某啲狀況，喺自己嘅歌都描述咗出嚟，除咗同聽眾共鳴，亦都係同自己有共鳴。人生都會經過好多唔同嘅成長階段，包括自己。」她坦言過去唱慢歌都以慘情歌為主，直至《13樓的大笨象》和《多喝水》的出現，令自己猶如面臨一個分岔位：「之前遇到一啲傷痛嘅經歷，好似《借》、《還》、《紅綠燈》所記錄嘅唔開心，慢慢經歷咗其他嘢，好似一粒藥，令我夠強壯面對一啲唔開心嘅經歷，開始有力量走出嚟，有力量改變、面對。」
憶Sammi唱《紅綠燈》爆喊 既驚訝又感動
現時樂迷談起鄭融，第一時間都會想起2006年的經典作《紅綠燈》，最近透過周筆暢和李克勤的合唱，令歌曲傳到新一代的樂迷耳中，但這首歌的意義絕非只在於單單衝出香港。記得3年前Stephanie擔任鄭秀文《#FOLLOWMi 鄭秀文世界巡迴演唱會》嘉賓，當時Sammi之所以選唱《紅綠燈》，是因為這首歌陪她渡過面對抑鬱症期間最低潮的時期，唱著這首歌時更感觸落淚。Stephanie回想起這一幕，除了驚訝，也覺得十分感動：「呢一段咁具體分享係震撼嘅，當然佢講完之後喺我隔離喊仲震撼。（笑）但係我都有少少想喊嘅，呢件事太活生生，係一個太有血有肉嘅交流。作為一個歌手，最大嘅成就感莫過於用自己嘅歌，喺人哋嘅生活入面做到一個陪伴，有力量同溫度地扶持一下當事人。呢個係做歌手最大嘅意義，我嗰刻覺得好感動，好似做咗一啲有意義嘅事。」
預告下半年兩首新歌
除了演唱會，鄭融在下半年也將推出音樂作品，當中Wyman一幅《為民除害》的劇透相，有不少網民猜測是鄭融的新歌。她在訪問中也承認二人再與Dear Jane結他手Howie（翁厚樑）合作，以鐵三角姿態再出新歌：「呢一個三角組合，我真心好感激樂迷呢幾年嘅支持，當中可能有我嘅歌迷，亦有Wyman嘅支持者，甚至Howie都有，但係咁支持我哋嘅真係要好多謝佢哋，由《13樓的大笨象》、《多喝水》到今天，佢哋仍然有嗰份期待，我好感激佢哋。」除此之外，Stephanie也透露即將與期待已久的作曲人徐繼宗合作，是一首為她度身訂造的芭樂情歌。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
