獨家丨何廣沛讚陳曉華濕身Look好索 有CP感獲欽點再續情緣
何廣沛及陳曉華在TVB《回歸光影頌》單元《曙光》中演夫妻，所以有唔少溫馨場口，其中一場講兩人拍住拖喺雨中送貨，陳曉華一隻手繞實推住手推車嘅何廣沛，另一隻手為他舉傘，因為雨勢太大，兩人濕晒身。Cut機後何廣沛大讚陳曉華嘅出水芙蓉look好索：「佢係靚嘅，幾濕都改變唔到個妝容！」採訪：方騫平 攝影：沈健程
由於何廣沛及陳曉華喺劇集《異搜店》中有CP感，監製林志華欽點兩人「再續情緣」，孭重飛由《曙光》貫穿演到15集嘅《回歸》，即《回歸》主要演員陳煒及郭晉安嘅年輕版，林志華更大讚兩人演技有料到。
包保鮮紙打底怕凍親
早前，何廣沛及陳曉華喺西貢拍外景，book晒水車營造大雨效果，身穿白恤衫配深藍色外套嘅陳曉華，埋位前做好準備，上身包晒保鮮紙打底，她解釋唔係怕濕身透視會變得性感，而係怕濕晒身再吹風會凍親。
由於take咗好幾次，陳曉華濕晒身，頭髮滴晒水，但她依然笑晒口，拍得好投入。何廣沛乘機食她「豆腐」：「呢個靚女係邊個？我未見過…佢獻咗第一次濕身畀我！」記者追問他覺得陳曉華身材如何？何廣沛即變返一本正經：「我投入角色冇研究過，只focus佢眼神及頭髮，見到佢妝容不變。」陳曉華聽完就勁開心話：「聽住先」她又多謝何廣沛教曉佢好多嘢，又為她分析劇本，何廣沛更睇好陳曉華年底奪「飛躍進步女藝人」：「我等你喺台上多謝我！」
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|
