獨家丨余香凝自爆愛老公怕醜仔性格 同岑珈其新戲演最萌身高差
余香凝（Jennifer）和岑珈其繼電影《非同凡響》、劇集《地產仔》後，第三度在電影《緣路山旮旯》中合作，戲中兩人演繹最萌身高差的情侶。現實中兩人都未試過這種身高差戀情，但Jennifer又自爆愛男主角這類怕醜男，因老公正是這類男人。他們又話合作3次未夠喉，好想有下次，仲講笑話最好做埋親家。採訪：杜杜 攝影：沈健程髮型：@nickienickhair@orient4(珈其)、Ken Hui @Artify lab化妝：Carmen Chung@carmencmakeup_cc(珈其)、Lavinia Tang 服裝：STORY MFG from HBX@storymfg @hbxhk(珈其)、MAX&Co場地：HYC Bar＆Lounge
2018年Jennifer跟珈其合作完《非同凡響》後，成為無所不談的交心朋友，一直好想搵機會再合作，在《地產仔》對手戲不多，他們曾想過主動出擊，「我哋成日講如果可以做愛情戲就好，甚至乎諗過自己度個故事出嚟sell畀人，等人哋拍我哋。」今次終於有機會合作，仲要有感情戲，兩人都好開心。
有望做埋親家
Jennifer跟珈其高度相差10cm，戲中兩人亦演有身高差情侶，不過現實中兩人未試過跟這類對象拍拖，珈其承認跟角色一樣確有自卑感存在，「最盡都係對方一樣咁高，始終會有少少自卑，出嚟會唔會唔好睇？最大問題係根本唔敢去追高過自己嘅女仔，預人哋一定唔會接受，點會鍾意拖住個小朋友，自己都落咗閘先。」雖然Jennifer未試過同這類外形的男仔拍拖，但戲中男主角「阿厚」性格確實是她喜歡類型，「我係鍾意好似『阿厚』性格嘅人，唔係好講嘢，怕怕醜醜咁，我可以撩開佢，到佢對住我有第二種性格出嚟，令到佢笑我會好開心囉！（你老公係咁性格？）係呀！哈哈！」
兩人老友鬼鬼又同期升呢做父母，見面多了傾湊BB經，珈其笑言：「最好笑佢個B明明細過我個B，但係身形都係大過佢，身高真係有遺傳，哈哈！」兩人最開心小朋友可以從小作伴，同父母一樣成為好朋友。若然做埋親家又點睇呢？珈其搞鬼話：「我就梗係想佢哋基因好，夠高嘛！」
星島新聞集團慶回歸25周年專題網站，請即瀏覽
立即下載|全新《星島頭條》APPhttps://bit.ly/3yLrgYZ
|
鍾意就快D Share啦！
|
|
|
