台灣舞王羅志祥2年前遭內地網紅舊愛周揚青毀滅式分手怒揭荒淫史，男方如日中天嘅演藝事業一度毀於一旦，今年先啱啱重拾天王氣勢，估唔到依家又再被周揚青搶風頭。34歲嘅周揚青因為大爆料而令佢成功入行做藝人，同羅志祥分手約2年時間，雖然佢都有拍吓拖，但佢戀愛對象愈拍愈後生，依家仲傳出佢同細自己10歲、由選秀節目《青春有你3》出身嘅鮮肉男星段星星發展地下情。
佢哋被發現上個月大玩煮飯仔，不過周揚青就刻意未有Post出對方個樣，經粉絲仔細觀察字迹、鬢角等特徵後，就發現段星星多次出席周揚青嘅朋友聚會，男方經理人公司亦確認段星星只係出席「朋友聚會」。
雙方名氣明顯有落差，部分網友就寸爆段星星「很糊」（意指：不紅、過氣），相反周揚青嘅真人騷、綜藝節目等接唔停手，加上佢出身富貴又自立潮牌，財力驚人嘅佢亦曾表示唔介意將來會泵水畀男友使，佢尋日（6日）就晒出自己着上星星圖案服裝嘅靚相，仲留言：「雖然糊，但是架不住我喜歡。」疑似回應緋聞，明顯有弦外之音。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
