藝人林正峰與無綫小花游嘉欣緋聞傳足多時，雖然2人冇公開認愛，但由於經常出雙入對，早已係外界公認嘅一對。不過近日竟有消息指林正峰背住女友游嘉欣，偷嗒無綫小花劉溫馨斷正，疑似一腳踏兩船。有指林正峰被拍得與劉溫馨單獨約會，於土瓜灣撐枱腳，慶祝男方28歲生日，當日劉溫馨着上綁帶大露背連身短裙，大騷玉背加美腿，戰鬥上陣相當性感，而佢哋仲襯好同時着上白色服飾，如同情侶裝，相當有默契。據知當林正峰見到劉溫馨時，即除下外套畀女方披上，用餐時亦對女方照顧周到，主動幫忙切細食物及整理頭髮等，盡顯紳士風度，佢哋仲一齊食迷你生日蛋糕，男方又不避忌向女方分享手機內嘅照片，看似十分甜蜜。同時，有指劉溫馨較早前到旺角挑選男裝內褲，估計係送畀林正峰嘅貼身生日禮物。
東網聯絡上劉溫馨，佢指當日跟林正峰食生日飯但並非拍拖：「（食餐飯）都好正常，朋友唔係男仔就係女仔㗎啦。」至於買內褲送給男方，她則表示：「我入去我係睇女裝㗎，嗰度有男裝同女裝嘅底褲，大家唔好咁敏感啦。（知唔知林正峰同游嘉欣拍拖?）唔知啊，我從來唔會過問朋友嘅感情生活，所以都唔知佢有冇拍拖。（咁你哋係咪好朋友？）唔係好朋友都唔會食生日飯。」
而林正峰接受東網訪問時，更發出4大點回應澄清，指：「1.我生日的時候對方提出約食生日飯，雖然平時甚少傾偈，但因為係曾經合作過嘅前輩，諗住都只係聚一聚所以就去食，食完飯之後我哋都無同大家有任何聯絡，所以對今次呢件事都百思不得其解。2. 我要重申我無收過對方任何禮物，對方着得靚因為對方剛完成記招，外套也是對方自己的。3. 我要為到受影響的好兄弟游嘉欣致歉，佢成日畀人擺咗上枱。4.我真係單身，現在無意亦不會想發展任何戀情，只想寄情工作，亦學懂世途險惡，以後會更加小心。」
對於林正峰話跟劉溫馨冇乜點傾偈，只是前輩叫到就出去食飯，劉溫馨表示:「如果唔熟嘅，點會出嚟食飯啊，其實出面寫啲乜嘢，我都冇乜所謂，是但啦，清者自清。加上食完飯之後我哋各有各忙，我要忙着《白色強人II》嘅宣傳，係呢個禮拜先開始啲時間好返啲，冇聯絡有乜嘢出奇呢？唔使日日聯絡。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
