現年廿四歲的「甜心男神」魏浚笙（Jeffrey），因兩年前參加ViuTV的真人騷《調教你男友》，而被發掘入行，更憑着高大靚仔，瞬間吸納大批粉絲，並且深受廣告商的歡迎，可謂名利雙收，成為近期娛樂圈的奇葩。
事實上，Jeffrey自小是肥仔一名，體重高峰期超過二百磅，但他最終扚起心肝，並以極端的方法，用了三個多月，成功殲滅六十磅肥膏，過程有血有淚。「男神」地位得來不易的他，在孭飛的劇集《I Swim》，就落力操到一身爆肌，身形和演技同樣亮眼。而為保持Jeffrey的最佳狀態，身為經理人兼女友的陳芷欣（Evelyn）不惜全天候監控，去到邊都跟到實，既防他「偷食」，也防飛來蜢「爭食」！
為拍ViuTV 劇集《I Swim》，Jeffrey經運動和飲食苦練出六嚿腹肌，非常「吸睛」。
小學階段暴肥的Jeffrey，肚腩一截截好有肉感，百分百是「肥仔嘜」，最重時更逾二百磅。
患厭食症
被封為新一代「甜心男神」的魏浚笙（Jeffrey），由於參與ViuTV的節目《調教你男友》、《膠戰》，開始為人熟悉；之後參演劇集《IT狗》和《I Swim》再露光芒，人氣極速飆升。除了高大靚仔的煞食外表之外，還有他自身的努力不懈，譬如：在孭飛的《I Swim 》中，他不僅專誠找彭秀慧學演戲，還竭力鍛煉出六嚿腹肌和馬甲線，令外形「吸睛」之餘，演技也大獲好評，就連導演馮志強也大讚︰「佢第一次咁重戲，完全喜出望外，佢好有天份，真係冇揀錯，搵到Jeffrey等如《狂舞派》搵到顏卓靈一樣。」
不過，今時今日fit爆的Jeffrey，原來由細肥到大，體重曾逾二百磅，他憶述︰「中六時，同女朋友Evelyn一齊變『幸福肥』，我哋成日食消夜，直至去咗model公司casting，啲人就奇怪咁問：『呢個人咁肥都上嚟？』唉！心諗：『係咪真係咁差呢？點解唔做好啲自己先去呢？自己都未ready，唔怪得人哋批評你！』」
現年廿四歲的Jeffrey，一早公開有女友Evelyn；而戀情並未有影響其受歡迎的程度。
知恥近乎勇，Jeffrey遂扚起心肝，並用了一個極端的方法殲脂，他苦笑的說：「早上係咁飲齋啡，日食一餐，短短三個幾月內激減六十磅，但就搞壞身子，變咗厭食症、頭痛兼流鼻血。最後都係靠做運動，同埋配合高蛋白質等飲食方法。」近月，他還獲邀踩入大銀幕，跟張敬軒合拍賀歲片《超神經械劫案》，二人飾演一對出生入死的解款員。片中，他不單止有動作戲，還需要濕身騷肌，難怪他近日又再加緊狂操，兼且食得十分清淡。
自入行至今，Jeffrey從不隱瞞有一個相戀七年的女友陳芷欣（Evelyn）。二人經朋友介紹下認識，並且一見鍾情，譜出一段「姊弟戀」︰「佢大我四年，當時覺得佢好叻，出口成文，鍾意用成語溝通，說話文謅謅，寫文章咁。我當時諗佢係咪中文老師？我哋慢慢中和咗，我變得有啲文化，而佢就變得正常少少。」他還強調不怕公開感情影響事業，並大男人上身地說︰「要對另一半有承諾，冇人想做另一半，做到要匿埋。身為一個男人，要公開和保護。我唔會變，佢都唔會變。」Evelyn聽後肯定甜到入心入肺！
人氣「男神」Jeffrey，日前跟拍拖七年的女友Evelyn到尖沙咀超市，一起拍拖買餸，猶如一對小夫妻。
|
鍾意就快D Share啦！
|
|
|
