2022年12月28日星期三

獨家丨蔣怡《法證Ｖ》做Big Boss老公睇到心寒卻激讚：眼神會殺人 #蔣怡

獨家丨蔣怡《法證Ｖ》做Big Boss老公睇到心寒卻激讚：眼神會殺人

蔣怡（Coco）喺啱啱播完嘅TVB劇集《法證先鋒Ｖ》中原來係幕後Big boss，對於首次挑戰大奸角，Coco唔覺得太難演，更自爆珠寶設計師老公翁狄森對她演技讚不絕口：「佢話我好適合做奸角及殺手，讚我終於做到一個啱你嘅角色喇！仲話我會用眼神殺人，哈…」採訪：方騫平場地：中環鏞記酒家

蔣怡拍《法證Ｖ》愈拍愈有戲癮，但同時兼顧做個全職媽媽，真係有啲辛苦。



Coco喺《法證Ｖ》做Big Boss睇到老公心寒。



Coco首次挑戰大奸角，自言唔覺得太難演。



蔣怡愈演愈有戲癮。

劇中蔣怡飾演一位唔簡單嘅咖啡店老闆娘，藉住做催眠完成目的，最後同Bosco敵對。多年前Coco喺電影《新警察故事》中都試過奸奸地，但今次唔會奸到出面，因為所作所為係為咗信念，如同邪教教主，為信徒完成大事。



CoCo大讚黃宗澤會畀到戲對手，仲會幫對方諗埋點樣可以突出到角色。



蔣怡大讚黃宗澤係好對手。

她自爆老公睇完非常欣賞：「佢一直覺得我好啱做奸角及殺手，話我如果唔笑，個樣係好得人驚，好似好惡。以前我未拍戲時，佢成日想介紹啲導演我認識，話我會用眼神嚟殺人！哈…可能我成日都令佢心寒！而且用眼神殺咗佢無數次。」



劇中蔣怡飾演一位唔簡單嘅咖啡店老闆娘。



CoCo嘅眼神會殺人，真係睇見都心寒。



鏡頭前出現奸樣。



蔣怡客串拍《法證Ｖ》都有好大發揮。

係屋企唯一奸角

現實中Coco係屋企嘅奸角：「喺教育小朋友方面，全屋人得我做壞人，我會Say No、懲罰佢哋(子女)…所以一定激氣，我老公算好，佢會即時意識到我教緊小朋友，會懂得配合返，反而朋友投訴佢哋啲老公係豬隊友。其實喺屋企做奸人比拍戲更難，有時唔係Say no就搞掂，唔同小朋友要用唔同方法對付，比如囝囝必須用既溫柔又堅定語氣。」她強調最討厭寵壞小朋友，細路仔可以頑皮，但應該靜及停嘅時候就要話得聽，要有規矩。提到她上鏡消瘦了，她解釋疫情下苦了媽媽，因為要抱住當時只得1歲幾嘅兒子，每天煮足3餐，又要陪囡囡上網課及教她做功課，加上當時學緊中廚及調酒，拍戲又凍又冇得瞓，嗰段時間相當吃力。