早前坤哥太太因孭住一個疑似價值20多萬港元的Hermès落深水埗而成為傳媒焦點，不過後來他解話稱「其實唔使120蚊」，卻令網民誤會太太孭A貨。他坦言太太平時喜歡網購，而且沒有很強的購物慾：「佢唔係咁追名牌嘅，都係睇款式行先，可能佢真係咁啱睇中呢個款式比較舒服、簡單，但係都唔知原來咁似一個名牌袋，真係下次要小心啲，估唔到一個袋都咁多人留意。」
他又大讚太太向來非常慳家節儉，喜歡飲飲食食，從來不會要求自己買名貴禮物：「生日嘅時候我送過貴啲啲嘅袋啦，又冇網民講到咁誇張，佢唔太需要呢啲嘢，所以留番啲錢大家去食得開心，同去旅行仲好！」
坤哥透露三月會繼續有派歌的計劃，之後亦會參與劇集拍攝，他又表示以往的角色都沒有參與太多愛情線，而現時自己已成人夫，希望可以嘗試一些較成熟的愛情戲碼：「啲愛情線永遠都唔係由零去到最後，都係突然就一齊咗，冇中間嘅過程，希望可以拍啲有進展嘅愛情！我而家都結咗婚啦，可以咩都試下，我應該唔會再傳緋聞喇。（如果拍床戲點算？）都係專業精神去演繹啦，但都要睇下有冇需要囉，係唔係為做而做。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
