最強博彩盤路過關神器《串績王》：http://win.on.cc/football/
周四(9日)凌晨英超補賽，曼聯主場迎戰啱啱換帥嘅列斯聯遇上頑抗，喺落後2球嘅劣勢下，連追2球逼和對手2比2。雖然奧脫福球場12連勝走勢斷纜，不過就成功打番起查頓辛祖，佢相隔3個半月後再喺英超上陣，即刻入波幫曼聯執番1分，領隊坦哈格都讚：「辛祖返嚟」
列斯聯日前將領隊馬殊炒魷，球員知恥近乎勇大踢爭氣波，開波只係55秒，意大利新星基諾圖禁區頂割草式勁射入網。曼聯失守後瘋狂反撲，加拿祖有2次黃金機會分別射斜同被救空門，沙比薩放冷箭亦被梅斯利亞飛身撲出，曼聯入唔列波，48分鐘更有華拉尼擺烏龍輸到0比2。
坦哈格59分鐘換入查頓辛祖，形勢立即出現逆轉，3分鐘後拉舒福特接應達洛治右路傳中頂入，70分鐘查頓辛祖左路突破，同勞基梳爾合作撕破列斯聯防線，最後查頓辛祖禁區內快腳射入。曼聯追成平手後繼續狂攻，可惜未能拎到反勝入球。
查頓辛祖對上一次喺英超上陣已經係上年10月，之後因傷患及心理問題一直雪藏，直到上星期先喺英聯盃復出，坦哈格賽後表示：「今場感覺複雜，劣勢下搶到分當然開心，但我哋亦都失咗2分，差勁嘅開局係不能接受......對於查頓辛祖我好開心，佢返嚟我哋都知佢係個出色球員，佢好努力，我好享受佢嘅演出。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
