MIRROR於今天（5月18日）在太古城舉行記者會，宣布呂爵安（Edan）、柳應廷（Jer）、盧瀚霆（Anson Lo）、姜濤、江𤒹生（AK）和陳卓賢（Ian）將分別以不同主題舉辦《MIRROR "In My Sight" Solo Concert 2023/24》。
Edan、Jer、Anson Lo和姜濤齊現身並接受媒體訪問，分享近況和開騷感受。
【MIRROR成員】Jer+教主+姜濤+Edan今年開個人騷 7成門票預留MIRO優先訂購
上周日四人於馬來西亞出席大型音樂節，出騷前教主Anson Lo於IG宣佈病倒，對此他說：「依然有點肚痛和肚瀉，所以有繼續食藥，未來一兩天會睇醫生，可能返港之後未清晒，在那邊又冇睇醫生，除咗肚屙之外，又有些胃痛，問專業醫生意見就比較好。」
阿姜昨晚於IG公佈患病，原來他跟教主同一命運，阿姜說：「尋日睇咗醫生㗎喇，其實跟他完全一樣。」
鬥食榴槤Edan完勝
另外日前Jer跟Edan於馬來西亞比拼食榴槤，Jer說：「Edan贏咗，我輸咗，佢食咗15粒榴槤。其實隔天我已經覺得好熱氣，飲咗好多涼茶。」Edan則笑稱「壓倒性擊倒」Jer，他說：「我嗰晚係咁飲水。諗返轉頭有啲多，好似太癲！」
Jer笑言如吃了一年份量榴槤，連教主也說：「食得太多喇」，Edan說：「好彩又冇咩事，冇爆瘡，所以係好難忘嘅回憶。」
【MIRROR成員】教主Jeremy眼神交流有默契 Jer笑姜濤唱《Rumours》變「僵」濤
姜濤錄英文團歌超緊張
早前Jeremy、Jer、教主和姜濤亮相日本人氣音樂頻道《THE FIRST TAKE》合唱首支英文團歌《Rumours》，昨晚歌曲上架。
Jer直言好開心：「我哋可以登上一個國際性嘅平台，讓大家知道其實香港有隊組合叫MIRROR，希望透過今次嘅表演可以留意到我哋過往嘅歌曲，了解到我哋。」
姜濤坦承錄音時很緊張，被挪揄變變「僵濤」，他說：「係啊，僵硬個僵，錄音時的確係一Take過，聲音上唔想有任何閃失，可能肢體方面顧唔到咁多。我唔想有失誤影響到大家，所以我相信大家都係為咗件事好。」姜濤表示錄至中段，大家都開始放鬆下來。
Edan恨錄英文團歌?
說到給予自己幾多分數時，無份參加的Edan笑說：「我畀自己10分。」記者追問是否想參與，Edan說：「都想嘅，但同時會有壓力和感緊張，都會擔心自己能否處理到，下次先啦。」
Edan續說跟教主拍攝電影《盜月者》時，看到對認真地做準備，他說：「佢會不斷練啲和音，睇得出大家好緊張，我都在想，如果我有份唱都會超緊張，好犀利！」
問到演唱會邀請那位嘉賓，Jer笑稱當然不可「劇透」，在旁的阿姜即說：「我唔想萬一講啲咩都自打嘴巴，總之希望請到想請嘅人。
Jer為個唱練跑
至於演唱會準備得如何？打頭陣於7月初開騷的Jer已準備好流程，問到會否騷肌，Jer說：「肌肉就......我覺得係要操體能嘅，因為是首次一個人handle晒整個騷，我覺得要跑步練氣，所以keep住有跑步。」
說到上次開騷時Edan露腿，問今次會否騷肌，Edan笑言今次露手肘。在旁的Jer即說：「我睇住你（指Edan）露上身肌肉。我第一次開騷，計劃內冇除衫嘅打算。（請偶像林宥嘉？）嘉賓方面計劃當中，但請唔請到就要透過公司去跟對方傾談。（翱唱《兜圈》？）我都係靜靜雞喺ig Story度唱咗就算，點知佢睇到。佢有回覆，我都係小粉絲咁好緊張。」
聘團隊監察舞台製作
另外MIRROR紅館演唱會曾發生嚴重意外，問到舞台設計上的安排，以及會否擔心舞台機關安全問題，Jer即代答：「安全方面，公司特別聘請一個安全嘅團隊，去監察一啲安全嘅措施，所以我哋可以專心在舞台上做演出，我哋專注我哋嘅表演就可以。」
至於教主曾經扭親腰，問及怕否再傷及腰患，AnsonLo透露有定期進行物理治療，教主說：「治療師都話唔會100%康復，只係一個保養方式，叫我盡量唔好企咁多，但跟我做嘢抗衡對沖咗，所以攞個平衡，可能返到屋企之後即刻坐，喺屋企坐多啲。」
台上聲稱希望歌藝有進步的姜濤即說：「一定會練歌，在基本功上面想有多點進步。」不過4人個唱場地不同，怕否拿作比較？Jer即答道：「有好多嘢都要配合，無論檔期或場地等，我諗大家會搵到最適合自己的表演方法，會因應場地，不會令入場的Fans失望，一定會開心地領略到我哋想表達嘅演唱會訊息。」
說到之前RubberBand成員泥鯭批評姜濤說得獎感言一事，問到姜濤的看法時，姜濤即說：「其實向來對於任何前輩嘅提點，我都虛心接受，相信大家無論用咩形式去提點我哋，我哋都需要去吸收，多謝佢！（有否影響情緒？）冇，我成日都會睇到好多Comment，所以都習慣。」
最新影片推介：劉江專訪
對於成員AK跟Stanely日前提點姜濤，下次說得獎感言可以簡潔些，他也大表認同：「自己思考過之後，都有啲唔妥當嘅地方，其實唔洗佢哋提點我，自己都知道，會用最真誠嘅心去表達自己，只要唔好傷害到任何人就得。」
不過一眾姜糖很嬲怒，姜濤即說：「希望彼此都要一齊成長，我成日都話人無完美，其實我有做得唔妥當嘅地方，自己都會去反省。希望大家都可以同我哋一齊成長。」
記者：游艾維
精彩獎賞活動等您發掘：https://bit.ly/3ClEy1R
|
鍾意就快D Share啦！
|
|
|
