顏國樑在節目上指出，自己當年轉了去做輔警，月入只得千幾蚊，而當時已是當紅小生的潘翁則很有人情味，特地去警署找他食飯，顏國樑說：「食完飯大家爭畀錢，佢講咗一句話，好犀利，好有殺傷力，佢話你唔好同我爭，我搵錢易你好多。」主持鄧英敏就回應：「大家好朋友唔應該咁講嘢。」不過顏國樑都明白對方用意，亦因此決定「人望高處」，離開警隊轉做特約演員。
訪問出街後，原來潘翁面對不少輿論，有人跟他說：「乜你咁冇朋友，咁冇兄弟，你咁講嘢嘅！」含冤的他，於是藉著節目釐清誤會，潘翁表示：「佢話我當年好紅、搵好多錢，佢就咁啱比較失意，去做返輔警嘅時期。有一日我做完嘢搵佢食飯，食完我哋爭埋單，佢話潘志文話：『爭乜鬼吖！我搵錢易過你，我畀』」
他澄清：「唔係話我搵錢易過你，等我畀啦，我係話，我搵錢多過你呀，爭乜鬼啫？我畀我係咁樣講，分別喺邊呢？分別就係，我搵錢係唔容易，我唔會易過你，但我真係搵得多過你，我辛苦嘛，咪搵得多過你囉，咁咪我請囉，又唔係多。佢講返起依件事，咁我依家就講返個真相出嚟，可能佢唔記得咗。」
主持人問到有否跟此事影響與顏國樑的感情，潘翁亦沒有正面回答，不諱言兩人少接觸，只說：「近年來我哋比較少接觸，少來往，大家都好少見面，自從呢個訪問出咗街就好多人『啫』住我，話乜你咁樣對朋友，我唔係喎，我唔係咁講喎，事實上我係話我搵錢多過你，我請啦，呢個都係事實。我都出心㗎嘛，都係對你好㗎嘛。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
