前港姐馮盈盈依家重新出發，「復出」拍攝《逆天奇案2》，早前自爆對北上拍劇卻步嘅佢，終於都敞開心扉，近日就有內地網友於深圳野生捕獲馮盈盈，更拍到佢喺《逆2》中有感情戲嘅高鈞賢同場，隨即令二人傳出緋聞。見馮盈盈以白色外套襯黑色褲，打扮休閒咁行超市，仲推住一車食物，盡興採購。而佢身旁嘅高鈞賢就踢拖，現場未見任何攝製人員，旁邊緊跟嘅就只有馮盈盈助手，估計屬於私人行程。相中更見到馮盈盈企喺高鈞賢旁邊，大笑掩嘴，笑得勁開懷，網友就笑言高鈞賢氹到馮盈盈好開心，之後又一齊離開超市，唔知佢哋會唔會因合作而擦出愛火花。
高鈞賢接受東網訪問時謂：「嗰日我哋喺屯門邊拍戲，本來大家拍完戲食飯，我架車可以揸返深圳㗎嘛！咁咪帶佢哋去深圳食嘢囉！我哋都有買啲蛋糕畀劇組同事食，咁當然唔係得我哋兩個，仲有其他工作人員喺度。」說到他們二人現時單身，會否擦出愛火時？他謂：「我哋見面都唔夠4、5次，依家拍拖都冇時間我成日都要飛嚟飛去，不過做朋友都好好傾嘅，佢係一個好努力、用功嘅女仔，邊讀書邊拍劇，我都想幫吓佢，因為佢上套劇個角色唔係討好，但今次佢係做一個好好嘅女仔，大家角色上會多啲溝通。」
至於馮盈盈接受東網訪問，對於新戀情，她說：「我同Matthew唔係拍拖，當日係因為開工拍劇《逆天奇案2》，趁住中間有段休息時間，就同埋我女助手 一行三人去超市，買零食手信返去慰勞劇組同事，多謝網民話我哋有CP感，我哋係劇中飾演情侶，證明我哋作為演員係好專業好稱職，亦多謝監製咁有眼光，搵啱我哋一齊拍劇合作，我同Matthew因為拍劇先啱啱認識，見到佢開工嘅時候不單對我， 對台前幕後所有工作人員都好nice，但係呢段時間我只想專心工作，專注自己事業，所以我暫時無任何談戀愛嘅想法，同Matthew唔會有任何發展空間！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
