無綫的唱歌比賽節目《中年好聲音》叫好叫座，難怪獲得亞軍的李佳，工作不斷，幾乎隔幾天就要出席活動，加上要兼顧唱歌學校的工作，可謂忙到不可開交。這個位於將軍澳、三房兩廳的八百呎安樂窩，就是她一整天辛勞後，叉電的地方。
「之前未加入TVB，都已經覺得將軍澳係好方便，加上咁樣嘅價錢，租到咁大嘅地方，如果要我搬，我都唔知可以搬去邊？我哋一家四口，加埋一個工人姐姐，活動空間十足；就算呢個禮拜，我上海嘅親戚過嚟住幾日，空間都綽綽有餘。如果我要買樓，我諗我都會揀番呢一區。」李佳滿足的說。
這個將軍澳八百多呎的單位，既是李佳溫暖的家，又是她與學生上堂的私人課室。
李佳在上海曾拍下不少性感宣傳照片，並且意態撩人，自然值得放在家中當眼處，一再回味。
李佳表示比賽後粉絲倍增，當中更有熱情的粉絲會為她製作應援禮物，令她開心不已。
小鄧麗君
出生於上海、剛四十五歲的李佳（佳佳），在〇六年，曾擔任樂隊MANDARINA CHINA BAND的主音；而那時，她的樂隊更成為世界第一支樂隊，將拉丁音樂和中國流行音樂結合，所以她多次在內地，以及遠赴南美舉辦巡迴音樂會。當年聲名大噪的她，還獲得內地媒體爭相採訪，並封她做「小鄧麗君」。
雖然總算捱出頭來，但十年的酒廊歌手生涯，令她疲倦不堪：「十年來，我冇休息過，真係好攰！當時我剛滿三十歲，想穩定落嚟，Sunny來自英國，佢喺上海生活咗十年，大家都想組織家庭，所以我決定放棄唱歌去英國生活。」過慣了內地的生活文化，但嫁雞隨雞，一切都要重新適應。佳佳笑說：「英國啲樓比較舊，不過我哋當年住嗰度，三層高，有一千五百呎，只係賣三百幾萬，喺嗰度買一層樓嘅價錢，喺香港只能夠俾首期。」英國生活舒適、悠閒，但鍾意唱歌的她，卻放不下唱歌這個夢想。
李媽媽住在香港，六年前，李佳因為來港探望媽媽，從此就改變了她的一生。當年，獲好友邀請在宴會上唱歌的她，表演拉丁爵士樂後，全場掌聲雷動，令她感受到無限的滿足感，她憶說：「老公知道我好想唱番歌，佢一直將呢件事放喺心上，當時我只係講咗一句話，我哋不如搬嚟香港，佢就坐言起行。我哋就係咁，放棄英國一切搬嚟香港，由零開始。」
李佳的土耳其籍老公Sunny，無論有多忙，都一定會抽空出席老婆的每一場比賽，夠晒廿四孝。
在英國生活時，李佳做全職主婦，照顧兩個囝囝同老公，完全失去了自己的夢想。
手執這個亞軍寶座，李佳坦言已經非常開心，因為比賽當晚的競爭對手實在太強勁。
希望拍劇
來香港生活，第一件事就是要解決住屋問題，因為住慣了內地及英國的千呎大屋，在香港要找同樣呎數的住宅，對他們來說負擔實在太大。當年，佳佳和老公遊走了港九新界，最後找到了這個三房、兩廳，實用面積八百多呎的筍盤，佳佳開心不已：「呢個業主好好，六年以來冇加過租，所以如果將來買樓，我諗我都會揀呢一區；加上我呢家入咗TVB，呢度返工好方便，我嘅唱歌學校喺觀塘，呢度返去都好快，所以我冇諗過要搬走。」
在《中年好聲音》中獲得亞軍的佳佳，除了要應付唱歌學校的工作之外，還有各式各樣的演藝工作。譬如：她早前就與羅啟豪為劇集《天龍八部》片尾唱〈倆忘煙水裡〉及拍攝MV，她說：「起初我以為我哋要着古裝拍攝，其實唱歌以外，我覺得自己都有演戲天份，如果公司俾機會當然係最好」
如今得償所願再做歌手，佳佳最想多謝的人，不僅是老公，還有學生，她感激的說：「真係要多謝我啲學生，除咗喺比賽期間好支持我之外，疫情期間，嚟上堂其實都有風險，但佢哋唔理屋企人反對都嚟上堂，有啲仲刻意搵我補鐘。佢哋用呢種方式去支持我，等我可以交到租。」疫情期間，將軍澳這個家就成為了佳佳，私人教學的地方，她透露：「呢家都有學生上嚟學唱歌，一對一教學，當然收費會貴啲，大約一千五百蚊一個鐘。」
這個是兩個兒子的小天地，他們非常自律，每天都會執拾整齊房間，李佳果然教導有方。
李佳將兩個兒子的畫作貼在牆上，用來粉飾房間，而她就希望他們將來有機會入娛樂圈。
比賽前，有學生特別找了一個風水師傅，為李佳的家具放置一些風水物品，希望令她凱旋回歸。
李佳表示這些擺設，除了是她的幸運風水物之外，其實她本身也很喜歡玉石。
李佳表示他們一家人，每一年都會到土耳其度假，找到喜歡的擺設，就會運來香港，點綴一下這個家。
兒子入行
住過上海、英國及香港的佳佳，就覺得香港是最好！因為這個大都會，融合了世界各地的文化，除了有無限的發展空間，更充實了她的生活，她娓娓道來：「其實，我年輕時嚟過香港兩次，當時對香港冇乜嘢感覺；不過，六年前再嚟，見到香港嘅碼頭、世界貿易等等，感覺好繁華；加上媽咪住喺香港，我又係獨生女，住近啲媽咪當然係最好。至於小朋友嘅教育方面，香港好國際化，接受傳統教育又得，多國語言，我老公講英文，佢都適應到。」
佳佳的兩個混血囝囝，靚仔又可愛，她不諱言，希望他們將來亦能夠在娛樂圈發展：「我有刻意俾佢哋出鏡，好似細仔咁，之前都有幫人拍遊戲廣告，導演都話佢發揮得好好。」
現時，雖然仍然要租住別人的物業，但李佳的唱歌事業愈來愈順，財源自然滾滾來，要擁有自己的千呎單位，指日可待！
這個露台算是老公放鬆的好地方，閒時可以出來抽抽煙、唞唞氣。
李佳笑言偏廳充滿了比賽的足跡，果然戰蹟彪炳、難怪譚詠麟都稱她做「唱將」。
她坦言自己的琴技一般，但一般的表演，仍然游刃有餘。
早前，李佳與羅啟豪為劇集《天龍八部》片尾唱〈倆忘煙水裡〉及拍攝MV，這可算是她的第一首劇集主題曲。
|
鍾意就快D Share啦！
|
|
|
