提起政府宣傳廣告，相信最經典嘅莫過於「生命滿希望前路由我創」以及「2002年7月9日，李先生超速駕駛引致車禍，令妻子昏迷至今」呢2句對白最深入民心，而呢段勸喻市民切勿超速駕駛嘅宣傳影片，亦因開放式嘅結局引嚟唔少網友好奇，皆因大家都想知道「李太」醒返未。如今時隔21年，「李太」竟然喺社交網亮相外，仲引嚟唔少網友一度以為「李太真係醒返！」不過事實上，原嚟呢位「李太」只係一位演員，有着自己幸福美滿生活之餘，原嚟仲同過羅家英、黎耀祥合作過㗎！
原嚟飾演昏迷至今嘅「李太」本名叫方思蓮（Celina Fong），日前佢就喺社交網驚喜現身留言：「嘩，咁快已經21年，醒返好耐，不過已經唔係李太，多謝大家關心！」並搞笑補充差唔多每年都會被關心一次外，認真笑爆嘴。而事實上，1999年以模特兒身份出道嘅佢，都影過唔少性感泳裝相，亦同過羅家英一齊扮唐伯虎、秋香拍「搽油」廣告外，就連小本投資嘅港產電影都有份出演過，並與李璨琛、黎耀祥合作演出。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
