格連活特將離開曼聯。(Getty Images)
曼聯前鋒格連活特上年捲入家暴醜聞，雖然今年2月獲警方撤銷強姦、傷人等指控，但曼聯仍以內部調查為由將佢停賽。經過連番爭議後，曼聯周一(21日)發聲明宣布放棄格連活特，調查指格連活特雖然冇犯最初面對嘅指控，但雙方都同意結束合作關係，消息指摩連奴執教嘅羅馬同謝拉特領軍嘅伊蒂法克，都有興趣簽入呢位21歲前鋒。
曼聯官方聲明表示：「關於對格連活特嘅調查，我哋考慮到涉嫌受害者嘅意願、權利同觀點，以及曼聯嘅標準同價值觀，根據獲得嘅各種證據，球會認為格連活並冇犯下最初被指控嘅罪行......雖然係咁，格連活特承認有犯錯，並願意為自己行為負責，所有人都認同佢好難延續曼聯生涯，所以雙方都同意分開係最合適決定。」
曼聯未有交代「分手」嘅方式，係解約、出售或者外借，而據英國《太陽報》報道，謝拉特率領嘅伊蒂法克準備提出收購，並且願意向佢開出1,000萬鎊(約1億港元)年薪合約，而羅馬同加拉塔沙雷亦打呢位前鋒主意。格連活特同曼聯合約到2025年完結。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
