現年27歲的無綫小花陳嘉慧今日（1日）於深圳出嫁，與拍拖半年的圈外男友Calvin拉埋天窗，有指他們選址在深圳擺酒是為了遷就親戚，亦有可能是陳嘉慧已經懷孕。不過婚禮現場保密功夫做到足，未有讓傳媒入場，但就有安排傳媒到宴會廳休息。而嘉慧身穿一字膊婚紗，大露事業線，性感搶鏡，而圈中好友游嘉欣、梁敏巧及王虹茵則擔任姊妹團。
約下午六點，新娘嘉慧與一班姊妹團宴會廳會見傳媒，但新郎哥就未有現身。身穿拖尾Tube dress婚紗的嘉慧大騷白滑香肩，仙氣十足，一班姊妹在接受訪問時表示婚禮有不少感動場面，忍不住眼濕濕，而新娘子就表示：「我自己入場第一下都未有太大感覺，但行到半路我望一望大家，突然間覺得好似全世界都見證住我結婚，嗰一下真係好開心，忍住唔好喊。（先生有冇喊呀？）我見到佢都眼濕濕，好似仲感動過我。」
嘉慧大讚老公用心準備的誓詞十分有文采，令她非常感動，她還笑言：「有啲咩承諾？愛我一生一世就一定㗎啦，冇得走㗎喇，聽老婆話冇錯㗎喇。」她透露今次請的賓客九成九都是家人，只有4位姊妹是圈中人：「其實4位姊妹我都係臨婚禮前兩三日先通知大家㗎，大家都唔知情，畀我嚇親嘅。」嘉慧更大讚另一半是滿分老公：「咩都好，咩都鍾意！我覺得佢比我仲浪漫，婚禮好多嘢都係佢為我精心策劃，諗idea。」
至於閃婚傳聞，陳嘉慧就透露老公早在3月1號已經求婚，當時她亦一口應承，她直認雙方都鍾意小朋友，但對於生B一事就順其自然：「我哋慢慢嚟啦，我自己都好鍾意小朋友。（諗住生幾多個呀，老爺話生6個？）我加油努力，未停經之前諗吓先，如果我未停經嘅話。」她亦坦言兩人早前已在香港註冊，今次在深圳擺酒，過一段時間會在香港再請朋友食飯。
梁敏巧獲邀加入陳嘉慧婚禮姐妹團。談到好姐妹出嫁，她開心表示：「恭喜Erica（陳嘉慧），祝佢同老公白頭到老、求結同心及幸幸福福。我哋今朝5點半開始，所以都有啲攰，不過係開心嘅，喺兩、三日前我收到Erica嘅邀請，其實唔係好了解佢老公，今日算係首次見面，覺得佢好溫柔體貼，全程對眼都離唔開Erica，好好緊張佢嘅新娘打扮，睇得出佢好照顧及錫老婆，同埋好有紳士風度，會關心埋我哋啲姐妹。」她又大讚新郎風趣幽默，最感動是他準備的誓詞﹕「聽完先知道佢同Erica原來經歷咗咁多嘢。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
