「大帥哥」張衞健近日預告將同組合「BIG FOUR」成員梁漢文、蘇永康、許志安再度合體開騷，已經出道39年嘅佢，近期就先到澳門舉行演唱會，不過尋日（25日）網上流出綵排時疑出現意外，張衞健由高空墮下嘅驚人畫面曝光！
張衞健將在2月12日開騷，當中就有一幕佢同一座白色鋼琴綁埋一齊，並懸吊半空中，當下正在綵排演唱會環節，張衞健邊彈鋼琴，同時亦邊同鋼琴順時針旋轉，突然成個鋼琴疑不堪負重突然下墜，張衞健即被鋼琴壓喺下方，身旁嘅工作人員及拍攝者都立即停下手頭工作，上前關心佢有否受傷，場面非常驚人。
東網即聯絡張衞健，詢問佢有否受傷？佢即中氣十足報平安，更表示已將該表演環節取消：「冇事呀！冇事呀！大家放心！冇事呀！呢個係之前嘅綵排，已經取消咗喇，我依家個環節已經取消咗。放心，冇事冇事！（因為出意外所以取消？）呢個表演唔係因為太危險取消，我相信將來都會用番，不過要等啲零件到齊咗，到時先會再用，唔使急啦。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
