「第四十二屆香港電影金像獎」將於4月14日假文化中心舉行，今午（6日）大會揭曉19項提名名單。影后方面衛詩雅憑《不日成婚2》成功作出「零的突破」，獲得入場卷，與余香凝、《填詞L》鍾雪瑩、《毒舌大狀》王丹妮及《四拍四家族》謝安琪爭影后寶座。鍾雪瑩得悉入圍即表示：「我喺度執緊屋就收到好消息，多謝大會畀我嘅心意，好開心以一部廣東歌故事嘅電影進入呢個電影盛事，我會繼續努力，同埋好開心第一次做女主角就入圍。」而入行15年的衛詩雅得悉入圍後開心表示：「真係一啲都估唔到，最多謝公司英皇娛樂對我嘅栽培，同埋《不日成婚2》導演及成個團隊，因為冇佢哋就冇呢個機會。」
而《金手指》梁朝偉則惡鬥林保怡、《毒舌大狀》黃子華、《第八個嫌疑人》大鵬、《年少日記》盧鎮業，爭影帝寶座。入行37年的林保怡早前雖失落金馬獎「最佳男配角」，今次卻「升呢」爭金像影帝，可喜可賀，至於廖子妤宣布男友盧鎮業入圍一刻，表情感動，而她本身亦憑《毒舌大狀》入圍角逐「最佳女配角」，與梁雍婷、金燕玲（《不日成婚2》）、楊偲泳（《毒舌大狀》）及韋羅莎（《年少日記》）。
梁朝偉表示：「好開心可以入圍今年香港電影金像獎嘅男主角提名，多謝所有投我票嘅人，亦都祝賀所有入圍嘅同業！」
「最佳導演」方面，莊文強憑《金手指》，與卓亦謙（《年少日記》）、簡君晉、鄭保瑞（《命案》）及吳煒倫（《毒舌大狀》）爭獎，而吳煒倫亦同時入圍「新進導演」。
至於「最佳男配角」方面，吳慷仁憑《但願人長久》成功入圍，與姜大衛、黃梓樂（《年少日記》）、李尚正（《死屍死時四十四》）及謝君豪（《毒舌大狀》）爭獎。值得注意的事，吳慷仁早前憑《但》片在《電影評論學會》得「最佳男主角」，今次似有「降呢」之嫌。而電影《年少日記》、《命案》、《金手指》及《毒舌大狀》則入圍角逐「最佳電影」。
謝安琪首次角逐女主角，開心表示：「收到同事打來，跟我說自己獲得金像獎兩項提名最佳女主角及最佳電影原創歌曲。內心的激動難以言喻，一時間情緒太多，竟然在街上不顧一切的大叫大哭。這是我人生第一次獲得金像獎的提名呀。然後，慢慢地，一點一滴地回憶，拍攝和主題曲錄音，許多感受湧上心頭。」謝安琪再接受《東網》訪問，她表示：「今次係我第一次獲得金像獎提名，心情特別激動，因為我已經多年冇參與電影拍攝工作，重新投入拍攝就有咁好嘅鼓勵，好感謝我嘅好朋友兼導演賴恩慈邀請我擔任佢人生第一部電影嘅女主角，更加多謝監製Uncle Teddy 泰迪羅賓同廖婉紅一直支持。能夠入圍已經令到我哋整個團隊好鼓舞，再加上同時獲得最佳電影原創歌曲雙提名，不論賽果如何都已經係非常榮幸。」
有份角逐「最佳男主角」的林保怡現正身在街巿辦年貨，他受訪時謂：「我依家喺商場同街巿買緊啲新年日用品，公司突然CALL我話獲提名，好開心好興奮，真係第一次有咁嘅成績，好似上次話齋獲提名就好似得咗獎咁，唔得，依家去街巿買隻雞，劏雞還神先得，多謝大家。」
梁雍婷獲提名「最佳女配角」，此乃繼提名金馬獎後再獲提名，難怪她興奮表示：「真係好開心有提名，但更開心係套戲嘅團隊有好多提名，再次恭喜團隊上下每一個人。」
李尚正憑着電影《死屍死時四十四》提名金像獎「最佳男配角」，而同樣有份角逐此獎的包括好戲之人《毒舌大狀》的謝君豪、《但願人長久》的吳慷仁等，李尚正表示：「能夠得到提名我自己好開心，呢一刻我即使係開緊工，都忍唔住興奮錄音多謝廣大嘅觀眾、評委同所有電影工作人員嘅努力呀！」至於憑《毒舌大狀》角逐「最佳女配角」的楊偲泳則於社交網限時動態PO出：「SO HAPPY」，事後她回應謂：「感恩！希望大家可以一齊上台，我真係好愛好愛毒舌呢個family。」
而同樣有份憑《毒》片提名「最佳女配角」的廖子妤表示：「呢部戲係我演藝事業中其中一個最重要的里程碑，除咗喺票房得到好好成績，依家喺金像獎又有咁多項提名，真係好開心，我哋拍攝時都好開心，每日就係講劇情，點樣可以做得好啲，我喺導演身上得到好多力量，要多謝啲對手，我嘅好姊妹王丹妮同楊偲泳，我好期待金像獎一齊行上紅地氈嗰一日。」
盧鎮業有份爭影帝：「多謝導演同對手們嘅信任。能夠同《年少日記》台前幕後共同經歷呢個創作，係近年最快樂嘅事。 好掛住大家。」入圍最佳新演員的吳冰表示：「呢個提名為我嚟講好緊要多謝大家嘅肯定。」
謝君豪入圍最佳男配角，他表示：「好開心！多謝所有投票畀「金遠山」的電影人，《毒舌大狀》喺舊年年初上映時得到很好的成績，之前亦剛剛亦憑呢個角色拿到新時代國際電影節最佳男配角，多謝大家支持！好開心，另一方面好刺激，因為今年男配角提名高手如雲，能夠有份提名，與有榮焉。多謝導演吳煒倫寫左一個咁好嘅劇本，同埋畀一個咁好嘅機會我去演繹呢個角色，今次《毒舌大狀》獲得10項提名！真系好開心！我會繼續努力，多謝！」
吳煒倫憑執導《毒舌大狀》獲得金像獎「最佳導演」及「新進導演」兩項提名，而記者會上金像獎主席爾冬陞特別提到《毒》片票房過億﹗對於今次成績，吳導表示﹕「能夠入圍好開心！新導演方面，我係未認識祝紫嫣嘅，但其他幾位導演就都係好朋友。我個人睇好簡君晋同卓亦謙攞『新導演獎』，但新導演獎有獎金喎，搞到我都想爭吓添。」
王丹妮入圍爭女主：「剛剛收到消息，喺今屆金像獎獲得最佳女主角嘅提名，我自己冇估到，覺得好驚喜。今年有好多好出色嘅電影同角色，自己好榮幸可以同咁多位出色嘅人一齊獲得提名，我好感恩。一定要多謝安樂電影，多謝江老闆，多謝監製Ivy，同埋導演Jack，好多謝佢畀呢個機會我，去演呢個咁有挑戰性嘅角色，好多謝拍攝團隊嘅每一位，我好感恩可以同團隊裏面嘅每一位一齊共事。《毒舌大狀》能夠有咁好嘅成績好多謝每一位入戲院支持嘅觀眾。毒舌嘅每一位都好努力，能夠拎到咁多個提名，我好希望導演、子華，Fish，Renci，君豪哥都可以攞到獎，另外亦都好期待可以同《毒舌大狀》嘅團隊一齊行紅地氈，去感受今次嘅盛事。依家嘅我正身處多明尼加共和國，雖然好遠，但都感受到大家滿滿嘅愛同支持，毒舌係我第二部電影，大家見證住我嘅成長。所以好多謝大家，我會繼續努力。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
