藝人蕭正楠（阿蕭）與太太黃翠如結婚逾5年，雖然經常被追問何時生B，但阿蕭認為一切隨緣。日前他孖住賴慰玲為新劇開工，直言與翠如在新一年仍未有生育打算，而賴慰玲則興奮地宣布囝囝終於學識寫字，笑指囝囝的字是「全世界最靚」。
蕭正楠（阿蕭）與賴慰玲日前在網球場為無綫劇集《奔跑吧！勇敢的女人們》開工，由於二人均懂得打網球，笑指雙方絕對可以組隊落場，賴慰玲自言一直都有學習打網球：「但係我啱啱試打嘅時候，導演話『都係借機位啦』，所以我希望今年嘅網球技術可以進步。」而阿蕭則自言球技不錯：「都可以對搓到十板八板。」
問到可會趁龍年與翠如生B？阿蕭笑言：「幻想吓先我哋其實好自由，如果有都係一個祝福，等上天安排。」不過育有一子的賴慰玲，則興奮地宣布已經升讀小學的兒子終於懂得寫字，更親自執起毛筆寫揮春，她笑說：「真係寫得好靚，係全世界最靚嘅揮春。」
展望龍年愈來愈好
談到龍年展望，賴慰玲希望世界和平：「真喺好緊要，因為想睇到多啲好嘅新聞。」而阿蕭則期望股市和樓市有所上升：「因為我估香港市民大家都買咗好多，所以希望啲樓市可以健康發展，唔好畀佢哋負資產。（你有冇買？）我邊有錢買。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
