《第42屆香港電影金像獎》最佳男配角今晚（14日）揭盅，76歲資深演員姜大衞揮低台灣金馬影帝吳慷仁，憑《白日之下》，奪得最佳男配角，果然「姜」係老嘅辣！入行超過70年的他，首次入圍該獎項便奪獎，全場起立鼓掌致意。他於台上指自己與哥哥秦沛都是由弟弟爾冬陞有份做幕後之電影奪獎，談到得獎感受，他向台下太太李琳琳大講愛的宣言：「我好想多謝我太太，今年喺我哋結婚５０周年，妳話想我以最低調的方法將個獎交畀妳，I Love you！」台下的李琳琳被老公的一番感言，感動到眼濕濕並向老公飛吻，可謂甜到爆！
姜大衞續稱，以前覺得攞不攞獎不太重要，現在則覺得，獎項對演員好重要，是對自己的一個肯定，他還表示：「我咁多年只係打過一份工，就係電影人，電影畀咗我好多嘢，家庭、工作、朋友...所有嘅嘢，第二世除咗屋企人，我希望可以繼續做電影人。好多謝古天樂、爾冬陞，同埋無佢就無我，張徹導演，多謝。」
姜大衞於台後受訪，仍難掩興奮心情：「我成日話攞唔攞獎冇所謂，但其實有所謂，係會好開心同好激動，我相隔50幾年再攞獎，好多謝所有觀眾同朋友嘅肯定，我一生人都係做電影行業，將來都會繼續做，唔會退休。今次真係冇諗過會攞獎，亦有睇晒所有提名人嘅電影，佢哋都做得好好，邊個攞我都會戥佢高興。
談到怎樣慶祝？他笑言：「要問我大人，（加家用？）佢加畀我就真，我諗會嘅。」他還指希望將來可以拍多些好電影，多些觀眾入場睇戲。李琳琳被發現戴了助聽器，姜大衞指太太年紀大，一邊耳仔比較嚴重，另一隻就較弱，要戴助聽器幫助，姜大衞搞笑謂：「如果佢唔戴嘅話，我可以鬧佢，哈哈。（唔驚跪玻璃？）我今日攞獎，唔會。（會唔會同太太合作拍部戲？）唔好喇，我哋百幾歲邊有人睇，佢拍佢，我拍我好喇。」
至於洪金寶榮獲「終身成就獎」，於張艾嘉手上接過獎項。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
