藝人姚嘉妮與林祖輝本東網獨家被爆出結束18年婚姻，2人強調不涉及第三者。有傳姚嘉妮舉行婚禮當日完成註冊手續後，竟當住老公林祖輝面突然熊抱擔任兄弟團的陳山聰狂咀，林祖輝亦一度尷尬黑面。
對此，陳山聰接受訪問時表示：「其實我當嘉嘉係阿妹咁，而且我都係啱啱先知佢哋婚變，當知道呢個消息，我都覺得好突然，點解會咁？因為當年佢結婚嘅時候，我都係做兄弟，亦明白家家有本難念的經，而且每個家庭都有自己背負嘅嘢，咁所以都應該尊重佢哋嘅決定，希望佢哋生活愉快。（會唔會慰問佢？）明白呢段時間佢哋都會有好多事要處理，咁所以我都唔打擾佢住，暫時畀啲空間佢哋，遲啲我諗會約埋陳敏之同佢一齊食個飯傾吓偈。」
對於被指同姚嘉妮狂咀一事，陳山聰斬釘截鐵否認：「邊有呀，梗係唔係梗係冇咁嘅事啦，邊有咁嘅事呀。我記得當時喺黃金海岸註冊，我同祖輝佢哋咁熟，你哋都會諗到祖輝喺隔籬，仲啱啱結婚，佢點會熊抱我然後錫我呀，呢啲都只不過係一啲傳聞嚟。我哋絕對唔會，因為我哋係好好嘅朋友。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
