林峯呢日以西裝造型出席連鎖米線品牌活動，打扮到官仔骨骨係因為要配合返新推出嘅「爵士湯」。米線品牌嘅辣向來吸引不少愛辣之人幫襯，林峯表示自己多揀中辣，老婆基本上只會BB辣。問到平時會否下廚煮幾味，林峯即失笑：「我老婆比較識煮，煮嘢係講天份 ，我唔係好有。成日睇啲人話落少量、適量，咁即係幾多？我試過要落糖但落咗鹽。」林峯表示自己最拿手煮公仔麵、撈麵，又會向好兄弟吳卓羲請教。
暑假將至，林峯透露女兒已經喺香港參加暑期班，而他則負責接送。「一嚟想佢陪我所以接佢嚟香港，二來係佢唔係幾識廣東話，我好想佢可以講到廣東話。其實最緊要係環境，而家係最佳學語言嘅年紀。（用咩辦法？）我老婆叫我同佢講多啲。（播你啲劇俾佢睇？）呢個好掙扎，因為呢個係最簡單又有娛樂性就係睇我啲劇，但又唔想成日佢對住個電視。」
提到有份主演嘅《九龍城寨之圍城》差5百萬登頂，林峯表示由於大家已開劇、開戲，就算慶功的話都要夾時間。「如果谷票房，我有叫Philip唱《Monica》，或者坐巴士遊走香港，吊住佢喺外邊。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
